Ina teskaa hannde pelle keewɗe ina innitoroo pelle daraniiɗe pinal. Ɗeen dille ko ɗooyɗe, kono ko e oo jamaanu ɗe ɗuri yuɗɗude. Ina moƴƴi siftinde ko caggal hare adunankoore ɗiɗmere (1939-1945) Fedde Leyɗeele Dentuɗe sosaa (ONU).
Caggal ɗum Fedde adunayankoore toppitiinde pinal sosaa (UNESCO). E oo sahaa hannde pinal e ɗemɗe keptinaama wonde jojjanɗe aadee nde tawnoo pinal woni fittaandu leñol (aadee) ina moƴƴa e nder yeewtere men paamen hol ko firti pinal ? Fulɓe ina keewi wiyde neɗɗo adotoo ko e juuɗe wattintoo ko e juuɗe.
Hol ko ngol konngol tinndinta?
Aadee jibinte. So o jibinaama o arata ko omo ɗolii, omo holi to bannge ganndal. Juuɗe ɗe o ari ɗee mahii ko e renndo. Renndo ngoo mahii ko e sato e lemmingol caɗeele e humpitooji, moraa, sañaa, heɗindaa haa aada yuɗɗi to bannge koɗki, faggudu e jaŋde ekn….
Ko ɗum addani aadee seertude e jawdi e kullon. Ndiin mahateeri woni finaa-tawaa. Finaa-tawaa mo yonta kala memtotoo ngam yahdinde ɗum e sahaa mum e kala geɗe nguurndam. Oon finaa-tawaa daɗirta ko anndude hanki, anndude hannde e heblanaade janngo tiindaaɗo o.
Banndiraaɗe janngiyankooɓe Fooyre Ɓamtaare; Fuuta, hanki wonnoo ko dooɗe guuɗaaɗe, hannde Fuuta wontii maarooji e kocce jiggaaɗe leyɗeele goɗɗe goɗɗuɗe. Fuuta hannde wuuri ko e jiggoore. Woni fawde nguurndam mum e goɗɗo. Oon Fuuta hanki ɗo mamma Liihdel e Abdullaay Kummba njibinaa, mawni; ɗoon Fuuta mo taaniraaɗe maɓɓe Maram e Arwaa …
Maram e Arwaa wuurtooɗe hannde paayta wuro ngo cosnoo hono Cooji Ngulli e Barkeeje e hitaande 1900 ko kamɗe e goonga ɗurata faamde waylo-waylo jamanuuji. ƴiɗaa annomineede ɗo ko nguurndam ñiɗaaki ɗo gootel, weeyo heddaaki ɗo wonnoo. Kala yonta won ko tawi. Kala yonta ina daña ko ɗeydi e ko tawi ko. Nguurndam ko noon siforii. Ngooroondi nguurndam ko faggudu, gila e ndema, awo e ngaynaaka e mbaylaandi e kuutorɗe mum. Huɓinndaade ɗee geɗe, marde ɗe , naattinde ɗe e mum gila e jotondire hakkunde majje woni pinal mo daabaa mum woni ɗemngal. Pinal, iwdi mum ko finde / findinde, maandinta ko ɗemngal, aada, faggudu, koɗki…
Ɗum firti anndude hoore mum e sato mum, hisma nokku mum e renndo mum e dow hoomtooɗe e naññooɗe. Ŋakkeende pinal jibinta ko kalfaandi e banngeeji kala. Paamɗo jotondire ɗee yiyrat e kala sahaa peeje no hisiri no hisiri hanki, moƴƴiniri hannde e no heblortoo janngo.
Musiɗɗe, yoga e gollotooɗe e pelle pine ina mbiya ndaranii ko wuurtinde hanki. Hanki yahdii e hanki. Foti wonde ko anndude hanki ngam faamde hannki waawaa wuurde hannde. Banndiraaɗe, hanki men mo woɗɗaani no feewi, nguurndam leydi men ko e njiimaandi koloñaal kala ko faarnortenoo gila e ɗemngal e ganndal e cañu renndo e karallaagal, kaloñaal bonnitii ɗum, nuskii ɗum e dow etaade tafde e nder renndooji men yimɗe sikkittoɗe ɗo iwo ɗo, ngañta ko tawi ko, tawa mawninta, cemmbinta tan ko ko koloñaal yiɗi, daranii. Koloñaal yerɗinii ko ngooroondi nguurndam men, iirɗini fof.
Kamɓe eɓe peena e yeeso koloñaal ko ɗe finɓe sabu taƴondirade ɓe e renndooji maɓɓe, nehdi maɓɓe e jaŋde maɓɓe. ɗum woni wosteede. Hannde miijo koloñaal peeñirta ko e fedde anndiraande OMC (fedde huptidinnde toppitiinde njeeygu ) e FMI e Banke Monjaal e francophonie e pelle goɗɗe….
Yoga e finɓe men e ardiiɓe men ina ngoongɗini ɗi, hay so tawii hannde won e maɓɓe faamɗe ina etoo yiilaade peeje mahtaade jotondire hakkunde leƴƴi Afrik e laamuuji mum e dow renndinde doole ɗe to bannge faggudu pinal ngam yiilaade peeje mahde leyɗeele dentuɗe Afrik (Etats Unis d’Afriŋue) so goonga guurɗo e njelaari toowataa sabu ɗeɗɗere to bannge faggudu. Kaan ngonka pinal woni tummbowal leƴƴi e renndooji haa nde piɗɗitii, fiɗɗitaare anndude hoore mum, ngam waylude ngonka mum e nguurdam mum, yiɗaa maandineede ɗo ko oo jamaanu gonaaɗo ɗowi ɗum ko ƴellittiɗe to bannge faggudu. Peeje maɓɓe ciynirɗe miijooji maɓɓe ko MONDIALISATION (juljultondiral aduna oo).
Ngaal juljultondiral kuutorgal mum dowrowal ko tamde kumpital e nder aduna oo fof. Oo aduna mo cifii-mi ɗo ko heen ngon-ɗen. Pulaagu men hannde wontii pulaangu rap, Pulaar enternet, pulaagu ndema ilnateeka, Pulaar nehgol jawdi e mbaydi kesiri (ko ɗum woodi njahden heen tawa eɗen peewnita ko ooñii heen ko) mbaawen sompude ko hesɗi e fawaade e ngoƴaaji mem. Hanki wonnoo ko arɗo CAMMBULLEL paarnotoonooɗo nagge, puccu e njaru, hannde ko arɗo BOOKAR BAH paarnotooɗo enternet e karalaagel kesal, janngo ko arɗo AAMADU BAH mo ngoƴa mum wonoyta yah-ngartaa hakkunde leydi, koode e gooto e maɓɓe kala ko arɗo e goonga e jamaanu mum. Banndiraaɗe njiɗ-mi wiyde e tonngol ko so aɗa yiɗi heedde neɗɗo e hakkille mum a heedat ɗum e pinal mum ɗum woni ɗemngal mum e faggudu mum.
Abdullaay Haaruuna Sih
