Minen Teyi ko Dental rapooruuji (jabbaaji) ɗiɗo hono Omso (Omɗo). Ngal sosaa ko ñalnde 17 saawiyee 2004. Ɓee ɗiɗo daaɗe mum en, jime mum en, e ngamri mum en, ndillinii ujunnaaje e ujunnaaje sukaaɓe rewɓe e worɓe e nder dingire tokoose gure dowri kam e dingire tokoose e mawɗe teeruuji Moritani. Iwdi maɓɓe ko Fuuta; ɓe nganndu-ɗaa ko yooro saabiingo uujo kam e mbayliigu ngonka renndo soggi ɗum en haa ɗoo e Nuwaasoot.
Tuggi nde ‘Minen Teyi’ sosaa haa hannde, alaa fof ɗo ɓe keddi ɗo e Moritani kam e caggal leydi Moritani fof. Ɓooyaani ko ɓe ngarti Ndar (Senegaal) ɗo Sanɗaaji (Etijaaji) Moritani kam e wiɗtiyankooɓe wonɓe toon mbisminoo ɓe. E ɗiin kiirɗeeli ɓe ndillinii wuro Ndar ngo. Ɓe kollitii ɓe mbaawka jabbaaji Fulɓe Moritani . Dental “Minen Teyi” addii kesamhesaagu, e mbayliigu e Hip Hop Moritani, kam e Afrik kala.
Jime kam e jimɗi ɓee naalankooɓe, ɓe hakkillaaji juumtuɗi ko waajaade renndo; suurtude geɗe renndo cuuɗetenooɗe, peeñnina, haa laaɓta. Ɓe cuuɗaaki e kuɗel, moggaaki e lekkel. Darnde maɓɓe ko haɓde e leñamleñamaagu, kam e kaɗooje ƴellitaare renndo.
Nde tawnoo ‘Minen Tey’ wuuri, etee wuurdi ko e renndo, faaɗaaɓe, ɓittaaɓe, hoɗɓe barakuuji; ko sanɗaaji kadi eɓe nganndi nguurndam mum en, e caɗeele renndooji ɗiɗi ɗii fof, ko ɗum addani ɓe suɓaade mikroo (njimri e gaaci) ngam waɗde ɗum kaɓtorgal ɓurngal faayodinde ngam daranaade e haɓanaade nuunɗal, deeƴre, muñal; ɗee kelme natta wonde konnguɗi tan, ngonta jikkuuji e nder aduna mo deƴƴere woni : fooleede, maa soodeede.
Rapooruuji (jabbaaji) e rap (jabbaagal), kuywinaama, ufnaama; haɗaani dental ‘Minen teyi’ haɓde e hakkillaaji kam e renndo. Hare maɓɓe ko hare jamyamre e haɓanaade famɗinaaɓe, huutorteeɓe, tampinaaɓe e nder aduna. Eɓe ndaranii kadi cellal renndo e ɓesngu sibu hay hikka ɓe tawtoraama mawningol ñalngu winndereyankeewu ngam ɓesngu. Tiitoonde mum wonnoo ko : ‘Ndoolndoolaagu mbaɗateengu e rewɓe’, jiidaani e kiirɗeeli nder Iniwersitee Nuwaasoot kam e saantar pinal Farayse.
‘Minen teyi’ ina foti yaltinde e maayirɗe hitaande nde ‘Album’, hono bannda keso. Ñalnde 21 suwee 2008, hol to luut on, ko ñalngu ‘misik’ (gaaci), ngaree kadi e keewal njiyon, keɗo-ɗon jimɗi e jime paayodinɗi; ballal mon kadi ngaddon. “Sibu ɗo e Moritani ñeeñal wuurnataa, laamu duñataa booñuuji mum heen” ko konngol Minen Teyi
Mammadu Maamuudu Baal
