Deftere nde winndaa ko e Nuwaasoot, ñalnde 18 mars 1979
NGARDIINDI : Ndeeɗoo yeewtere nde njogor-mi ɗo yeewtude, ko yeewtere pinal. Moƴƴi e yeewtere pinal noon ko finndinoore. Moƴƴi kadi e yeewtere waynde hono nii ko yeewtere, caggal nde nde yeewtaa, nde jibina duko pinal mawngo, wonndungo e hakilantaagal e nehdi.
Miin e hoyre am jeewtanoowo on oo, mi jooɗtoraaki yeewtere am nde alaa ko nanndi e jirwude e moƴƴude. Mi feccaani sikke, won ko heewi ko nde addaani, haawnaaki kadi no nde lelniraa ni feewaani. Kono ɗum fof e wayde noon mbiɗo ñaagii on, onon heɗtiiɓe mi e jogorɓe janngoyde mi, yaafuya. Kala ko gooto e mon waawi ɓeydande mi e feewnande mi, ko ɓeydanoowo mi ganndal. Janngoowo noon, ɗo dañi ko ina ɓeyditoroo ganndal fof ko e ɗuum abbortoo.
Ko heewi ko winndaa e ko fayti e Afrik ko ko fepindaa ; fepindaande ndee nii bonaani, boni ko pepindagol jiilatoongol ɓurnude e majjinde. ɓinndooɓe tuubakooɓe, ko ɓuri heewde e maɓɓe, njiyi e Afrik tan ko ko soofi. ɓinndooɓe men ne ngari tuugnii heen, so wonaa Sheex Anta Joop e Fedde mum. Ndeke noon Fedde Anta Joop en ndee, foti ko walleede haa aduna oo annda, so mbo yiɗi mbo saloo, ko ɓaleejo adii tageede, refti heen ko ɓaleejo adii addude pinal e duunde baaba Aadama.
Ndeeɗoo yeewtere feewtunde e aadaaji Afrik, he nde holla en hono leñol mbiyi-mi en meeɗaa waasde jeyeede e Afrik. Ngol seeraani e eggi-egginde hakkunde maayo Atlantik (ndiyam mawɗam) e maayo woɗeewo. Hina wayno ko tuubakooɓe mbiyata ko Asi famaro (Asie mineure) fof ko e Afrik jeyanoo. Alaa ko haɗi so wiyaama ‘Firawna’ (firawna ina waawi tawa ko ɗum konngol pulaar.ko laamɗo piyatnooɗo, baawnooɗo) ko laamu ɓaleeɓe yeddinaani.
Mbiɗo wasiyoo denndaangal yimɓe winndooɓe Pulaar, tawi ko ɓe Haalpulaar en (fulɓe) nde ɓe nduttittoo e aadaaji men, ɓe mbiña ɗi, ɓe kilñita ɗi. Hina waawi, e nder ngool biiñogol e kilñitgol, ma ɓe njiytu ko ɓenni mbiyi-mi en. Yo ɓe njaawno noon, so wonaa ɗum, yonta homo feeñi jooni mo wonaa pasniiɗo hoyre mammbo kala, ko mbo haalanaa ko fayti e aadaaji Afrik, mbo furƴinat, mbo ɓiiña, mbo wiya ko ɗum seremelleeji (bolle puuyɗe). ɗum ko majjere heɓnoo yimɓe ɓeen ! Mo anndaa, ko kam woni majjuɗo, koomtaaɗo, ñenngaaɗo, jogorɗo majjinde ngalu leñol ngol.
Mbiɗo sikki, ɓeen yimɓe he ɓe poti yuurnitaade ko ganndo pullo gooto biyateeɗo Aamadu Hampaate Bah wiynoo ko: «So nayeejo Afrik so maayii, ko cakeeje walla cuuɗi defte ganndal cu-mi» Ooɗo wiya, mbo firti ko yo sukaaɓe ɓado mawɓe, yo ɓe tarbinano ɓe haa ɓe keɓta gannde ɗe ɓe mbinnda ɗe. So wonaa ɗuum gannde Afrik fof ruttoto ko e nder leydi.Gannde garɗe e aduna oo ko ha ɗe kuutoree kono wonaa welsindeede haa mooƴu ñaama ɗe. Ndeeɗoo yeewtere, faydaare mayre ko wallitde mbiyi-mi en e miijaade. Njiɗ-mi ko yeddeede e fenneede tawa noon ko jeddugol e pennugol deftinatngol-mi e laawol goonga, jaltowol. Yo Alla wallu en, holla en goonga, ngannden ko goonga ndewen heen, o walla en, o holla en fenaande ngannden ko fenaande ngoppen. Aamiin ! Tiitoonde ƴeewtere pinal «Aadaaji meeɗen ɗi pot-ɗen wuurtinde haa ƴelliten neɗɗankaagal men, ko wayi no “Denɗiraagal”
E ko woni aada?
Ina jeyaa e ko paam-ɗen, neɗɗo gooto ina waawi ɗum tekde e hoore am, ɓesngu ara ñemtina walla tan rewa heen. Aada ko ɗum neesu mbo yimɓe ngaadorii, ko huunde nde yimɓe tawi gila heɓnaa-heɓni haa yottii en. Aada ina waawi moƴƴude walla bonde. Gootol e leƴƴi aduna ɗii fof meeɗiino jogaade aadaaji mum walla so en njiɗii mbiyen ene keddodii e majji. Ko goonga, won e leyɗeele ɗo ɗi ɗeɓi majju walla maaytu, walla famɗitde doole no e jatti Afrik.
Hol no aada foti ardude?
Hina gasa tawa ko neɗɗo gooto adotoo ɗum farlinde e hoyre mum, ruttii fawti ɗum e ɓesngu mum, ɗoon ne so yaajni mbo, fawi ɗum e leñol. Caggal ɗum leƴƴi ne ndaaɓndaaɓtondira aadaaji haa ɓooya ɗum huuɓtidina. Ko aadaaji kuuɓtodinɗi ngoni gontoyooji, saanga nde keeri leyɗeele taƴaa, aada leydi. Ko wayi no, e nder Fuuta, walla ɗo fulɓe ngoni, walla so en njiɗii mbiyen, kala ɗo mbiyi-mi woni “Denɗiraagal” nani ɗoon. Denɗiraagal Hol no ceerdirten denɗiraagal e aada?
Denɗiraagal waawaa timmu tawa yimɓe ɗiɗo tawaaka; aada noon neɗɗo gooto ina ɗum waawi addu.
Ko woni denɗiraagal?
Denɗiraagal ko aada tawaaɗo, baawɗo feewnude gondigal, koɗdigal, jiidigal. Eɗen mbaawi wiyde kadi denɗiraagal ko gootal e njuɓɓudi ɓurndi tiiɗde e welde e dakmude, kono caɗndi reende, ndi mawɓe mbiyi-mi hanki mbaɗnoo, ngam jokkondirde enɗam hakkunde jiiduɓe kosam, hoɗduɓe, rennduɓe golle, seertuɓe gure (wuro dow, wuro les), seertuɓe leñol (seerereeɓe e fulɓe), seertuɓe kinɗe (sannaraaɓe e pammbinaaɓe), Ekn … ɗum fof, e yiɗde ittude mette, tikke, e ngañamtumaagu e haasidaagu hakkunde ɓiɗɓe Aadama (juulɓe mbiyi waɗi noon jeddi hina ngoodi haa jooni hono neɗɗo tagraa ; ɓee mbiyi ko nii tan «matière» nii tan woni e ndiyam walla weeyo haa ɓooyi wonti kullel, kullel ngel ne wonti waandu, waandu ndu ne wonti neɗɗo. Al Kuraana noon «le Coran » wiyi neɗɗo tagaa ko e ɓakkere e ndiyam)
Haa tonngoode aroore
Holi ƴaayaa Mammadu Bah ? E nder tonngooɗe Fooyre Ɓamtaare payɗe, ma en njaltin yeewtere mawɗo men YAAYAA MAMMADU BAH waɗnoo yowitiinde e denɗiraagal. Yaayaa Mammadu Bah, wonande ɓe nganndaa, jeyaa ko e fuɗɗuɓe jaŋde Pulaar e Muritani, sosɓe Fedde Ɓamtaare Pulaar e Muritani. Ko o espektoor Posto. Ko neɗɗo jarlitiiɗo, jarlitaniiɗo leñol mum. Tuggude kitaale 1976 haa hedde 1986, galle makko ko duɗal pooynungal, ngal meeɗaa ñifde (Galle makko huccitnoo ko e “Santar rewɓe” gonɗo sara Lisee rewɓe ɗo, ina heedti fuɗnaange jehre mawnde Nuwaasoot, ɗo ɗatooɓe e jennankooɓe keewnoo jooɗaade ɗo). Galle makko kadi ko batirde peŋgal BMD wonnoo. Yaayaa Mammadu Bah, ko neɗɗo belɗo, giƴum yimɓe fof : kala ɗo o woni ko weytaare woni ɗoon. Alla ina anndi ko goonga tan kaal-mi ɗo. So Alla jaɓii ma en njokkondir makko mbele omo haalana en humpito makko e jaŋde Pulaar e Muritani.
Bookara Aamadu Ba
