E ɗeeɗoo balɗe ɓennuɗe, coodgu oogirɗe ɓeydiima no feewi e nder winndere nde. ɗum ɗoon noon ina heewi nafoore e leyɗe jogiiɗe ɗeen oogirɗe nde tawnoo gila ko ɓooyi ɗeen oogirɗe ko booynetenooɗe tan. Ɓurnoo waawde soodde ɗe ko leyɗe Orop walla Leyɗe Amerik dentuɗe (EU). Yoga e ɗeen leyɗe mawɗe nattii jogaade nguu ngalu, kono eɗe katojini heen no feewi. Ko ɗum tagi ina jarani ɗe soodoyde ɗe to woɗɗi, yeru to Afrik, Asi walla Amerik latin. Ina jeyaa e ɗeen oogirɗe jamɗe biyeteeɗe : iraaniyum, kiri, mannganees, kobalte, nikel, plom, kaŋŋe, jamaa, leɗɗe, petroŋ, wiro, gemha ekn… Ɗee geɗe noon ina keewi e Afrik, yeru to Konngo Kinsaasa walla to Afrik worgo, Anngolaa, Niiseriyaa, Sammbi, Senegaal, Muritani, Niiseer, Kamaruun, Caad ekn … Ɗeeɗoo leyɗe njeyaa ko e leyɗe kiisaaɗe « ɓurɗe famɗude doole » ; huunde haawniinde so tawii a ƴeewii ngalu majje. Haa e ko ɓooyaani ko, ko leyɗe mawɗe ko wayi no Amerik e Farayse … , coodooje ɗee geɗe, ndottaatnoo (walla mbaawnatnoo) coodgu majje, kono ɗum woni ko e waylaade nde tawnoo leyɗe goɗɗe ina katojini heen no feewi e oo sahaa, ko wayi no Siin, Inndo e Beresiil. ɗum noon, ko « doosgal jehre » dottata coodgu. « Doosgal jehre » firti ko coodgu huunde fawii tan ko e no sokliraa walla e keeweendi mum walla ŋakkeende mum : so soodooɓe keewii, ɓeydoo tiiɗde, so soodooɓe keewaani, weeɓa.
Ƴeewaa noon, gila e hitaande 2002, soklaaji Siin to bannge won ɗeen oogirɗe (nikel, njamndi, wiro …) ɓeydiima ko ina wona laabi 10. Soklaaji Inndo ko noon ɓeydorii (Inndo ina waɗi hannde ko ina wona miliyaar e teemedere miliyoŋ fittaandu). So artii e Siin noon, ɗum haala mum ko bannge. Hankadi firti tan ko leyɗe men ina mbaawi waɗtude waawnude coodgu njeegu oogirɗe mum en, hay gooto en mbelnaaki : so Farayse jaɓaani soodde coodgu moƴƴu tan payen to Inndo en walla Sinuwaa en, walla woɗɓe. Mate naggel men fayi ko e ɓesnude ? Alla dey alaa roŋki.
Bookara Aamadu Bah
