Rappooɓe e ɗemngal pulaar fulfulde ngoni hannde ngenndiyaŋkooɓe to baŋnge yontannde ndee! So jaŋngooɓe keɓaaka, batuuji njeebaama sukaaɓe, ko yimooɓe rap tan mbaawi hitjinde cekki hannde e darnde pulaar.
Hannde, Pulaagu.com ena holla-en sukaaɓe diɗɗal Iwdi Pulaagu, yaltinɓe CD mo alaa faayoore etee jimaaɗo e ɗemngal men. Woni Iwdi Pulaagu ko Saydu Feƴoor (Soyako) jibinaaɗo to wuro men FuutaTooro ena wiyee Fanay, diiwaan Podoor. Saydu janŋgi ko Dakaar haa heɓi yitaande nde waɗata BAC. Ko ndeen koyngal fiyi-mo, ladde noddi, o ɗannorii Maali, Kodduwaar, Ganaa, Togo, Benee e Nijeriyaa… Hakke duuɓi joy omo woni e ladde! O arti e Senegaal ngam ɓamtude jaŋde. Ko ndeen o naati to duɗal Ñeene (école des arts). O felliti kadi naatde e jimon rap e Yelaa. Omo wonndi e Bookar Gaŋnge (Boka), miñiraaɗo Usmaan Gaŋnge, gooto e ŋanaaji men to baŋnge naalaŋkaagal. Diɗɗal ngal yaltinii CD ena waɗi baaruuji sappo e ɗiɗi. Ko Ted-Production (Teddungal Promotion mo Mammadu Ñaŋ, manajeer diɗɗal ngal lollirɗo Birom ) yuɓɓinani-ɓe klip maɓɓe gadano ena wiyee « Clandestin ». « Clandestin yimata walla woytotoo ko caɗeele ɗanniyaŋkooɓe yahooɓe ena mboomoo e ladde, « en nganndaa nih ɗo ɓe payi »!
Iwdi Pulaagu jeyaama e kawgelaaji keewɗi bayɗi hono « Concours Coca Cola Beat Power Show » to Gaboo, Triple XL e Kase Sanga e tele Africable! Banndiraaɓe fulɓe, dente, pelle, jaŋngooɓe e jaŋnginooɓe onon kala eeraango ena fayi e mon ngam waɗtude hakkillaaji mon e sukaaɓe daraniiɓe rap e ɗemngal men sabu ko kamɓe keedti e yontannde hannde, yontaaɓe jaŋngo!
Ibraahiima Saar (pulaagu.com)
