Ñalnde 13 oktoobar 2006, golle gasgol woyndu ngam njiylawu petrol e njoorndi (onshore) puɗɗaama to nokku inniraaɗo Heron 1, e nder diiwaan Tararsa, worgo komin Mbalal, nder departemaa Keer Maseen.
Halfinaa ɗee golle ko sosiyetee sinuwaa biyeteeɗo CNPCIM. So petrol woodii taweede ɗo (ina hasii o tawee ɗo) ina yaakoraa ma ɗum waɗ ngartam keewɗam, moƴƴam wonande leydi ndi haa arti noon wonande Nuwaasoot, to bannge waawde waylude ɗum e leydi he e huutoraade gaas. Luggeendi ngaka ka (woyndu ndu) ko seeɗa Rakkata kiloomeeteruuji 4 (3 800 meeteer). Jooɗaniiɗo leydi Siin e Muritani jarfii kuutondiral hakkunde Muritani e leydi Shiin. O siftini wonde wonaa e oo fannu tan ngal haaɗi, wonaa jooni ngal fuɗɗii.
Hade ɗum tawi hooreejo sosiyetee Sinuwaa CNPCIMI kam e joo- ɗaniiɗo sosiyetee Brimaƴ njarfii heɓaare laamu Muritani wallitnde no feewi puɗɗal golle gasgol Heron 1. Ɓe kuniima ma sosiyeteeji maɓɓe ɗi ɗoofto baɗɗiiɗe e doosɗe winndereyankooje jotondirɗe e kisal e senaare e kisnugol sato.
Eɗen ciftina tan wonde jotondiral hakkunde leyɗe ɗiɗi ɗe ina seedtini, haa arti noon hakkunde kitaale 1970 e 1980. ƴeru mum ko ndiyam Idini ɗam Nuwaasoot yarata ɗam ; ko kippuuji safrooɓe Sinuwaa en (anndaaɓe no moƴƴi to Kiifa, to Sehilbaabi …) ; ko mahngo lopitaal Kiifa e Sehilbaabi ; ko mahngo, e nder wuro Nuwaasoot: galle sukaaɓe ɓooyɗo o, galle pinal ; Sentaraal kuuraa, ko anndiranoo CNH, Estaad olempik, poor Cehilaagal (Port de l’Amitié), ngesa Mpuriyee e ko wonaa ɗum tan.
Bookara Aamadu Bah
