Wagadu Saane, hono Fedde Ɓamtaare Ɗemngal e Pinal Sooninkoore, mawninii ñalngu 25 silto, ngu UNESCO suɓii yo won ñalngu winndereewu mawningol e guurnugol sooninkoore. Hikka woni ɗiɗmol ko ñalngu nguu ine mawninee, e gardagol Jaagorɗo Pinal, e Ñeeñe, e Kumpital, e Jokkondiral e Sarɗirdu, hono El Huseyn wul Meddu, ɗo Diiwaan Nuwaasoot ɗoo. Tiitoonde mawningol hikka ngol ko « Baɗte karalle limrewal he dow kisal e ɓamtaare sooninkoore ».
Aali Buubu Ganndegaa, hooreejo Wagadu Saane, siftinii ko sooninkoore woni laynirgal ɓurngal mawnude ndonaandi e pinal ɓesngu hirnaange Afrik ; kadi, sooninkooɓe fof e saraade nder aduna hee, haɗaani ɗum heddaade wonde ɗemngal guurngal, sabu darnde duumiinde pelle e ɗanniyankooɓe leñol ngol.
O siftinii sooninkoore ko ɗemngal ngenndiwal Muritani, ɗemngal laawɗungal to Mali, kaaleteengal no feewi to Gammbi, to Sengaal, to Gine Bisaawo, to Gine Konaakiri, e nder ɗanniyankooɓe to Afrik hakkundeejo, e fuɗnaange, e nder nokkuuji goɗɗi. Kono tan, hare binndol e jaŋde ɗemngal ngal, ko geɗal teeŋtungal. O wasiyii ɓeydugol ndeen darnde ngam ɓeydaade sarde ngal e ñiiɓnude ngal. O yetti feere laamu Muritani ƴetti ngam naatnude sooninkoore e Pulaar e Wolof nder duɗe laamu e hitaande 2024-2025, feere nde o siforii « taaɓal teeŋtungal ngam heɓtingol e paayodingol ɗemɗe ngenndiije ».
Jaagorgal Pinal kam ne hollii weltaare mum tawtoreede mawningol ɗiɗmol ñalngu nguu, caggal nde Unesco ƴetti feere ndee, o wiyi ko ɗum fartaŋŋe yaltinde ngalu e keewal e caragol ɗemngal ngal. Keɓtingol sooninkoore he tolno winndere ndee, ko keɓtingol faayiida mum e pinal mum, e ñiɓagol mum, nder leyɗe keewɗe, huunde feeñninoore semmbe mum.
Jaagorgal ngal hollii wonde Nokku mo ardii oo ine daranii, e dow yamiroore Hooreejo leydi ndii, ɓamtaare e tiiɗnugol ɗemɗe ngenndiije. E to oon bannge, o siftini wonde, e duuɓi cakkitiiɗi ɗii, ɗemɗe ngenndiije ɗee ƴellitiima, tee ɗuum ko huunde teeŋtinoore ngootaagu ngenndi e mahondiral renndo.
Ngam mawninde ñalngu nguu, Wagadu Saane (AMPLCS) yuɓɓinii cofte keewɗe goɗɗe, nder balɗe nay, gila e wejooji, jeewte paatuɗe e ɗemngal ngal, e darnde rewɓe nder kisnugol sooninkoore, ko jiidaa e kiirɗe pinal, e kawgelaaji pinal e jime.
Bookara Aamadu Bah
