Abdullaay Moodi Bah ruttiima e joom mum ñalnde altine 28/5/12 to Arafaat, caggal rafi juutɗo. Abdullaay Moodi Bah ko tergal Fedde Ɓamtaare Pulaar e Muritani. Ko o koohoowo e terɗe Catal Arafaat, sabu, ñalnde alkamiisa 1 sulyee 2004, o toɗɗaa yo o ardo goomu (peŋgal) leegal Misiidi Nuuru, haa ɗo o ruttii e joomiiko ɗoo. Yiilirde Catal ngal ina teskii e makko wonde jiɗɗo leñol makko, jiɗɗo ɗemngal mum, muñɗo, nuunɗuɗo, moƴƴo, laaɓɗo ɓernde. Wasiyaaji makko tan ko yo Pulaar jannge haa waawa neyɓinde booluuji no ɗemɗe yellitiiɗe ɗee nii. Ko o tergal gollingal, sibu o janngii, o jannginii e ɗee ɗoo kitaale : 1983, 1984 e 1985 to pengal Ndunngu. Tolno makko jangde Pulaar ko keblorgal jannginooɓe. Ko Pulaar o huutortonoo e haajuuji makko keewɗi.
O yiyi aduna ko e hitaande 1956 to Harsunde, falnde Ɓoggee. Baaba makko wiyetee ko Moodi Billo Bah, neene makko, Takko Geele Bah. Kanko Abdullaay Moodi Bah o janngii Quraana, o joofnii alluuje tati. O gollotonoo ko lopitaal ngenndi mo Nuwaasoot. O dañii ɓiɗɓe 6, nayo worɓe e 2 rewɓe.
E innde Fedde Ɓamtaare Pulaar e Muritani, e innde Catal Arafaat, eɗen nduwanoo ɓesngu Abdullaay Moodi Bah. Yo Alla yurmo mo yaafoo mo, kanko e maayɓe juulɓe fof. Aamiini.
Koolaaɗo Kuubal, Ibraahiima Hammee Sih.
