Ñalnde 30 saawiyee 2012, dental sendikaaji 5 sanɗaaji yahii gerew ngam ɗaɓbude ɓeydugol e kuɓtodingol bursiiji sanɗaaji duɗal jaaɓi haaɗtirde Nuwaasoot, kam e kaɓirɗe janngirɗe ɓurɗe moƴƴude wonande njiylawu. Gardiiɗo duɗal Nuwaasoot yamiri polis naatde e nder duɗal hee, e fiyde sanɗaaji ɗi mbaɗaani hay dara, so wonaa waɗde seppo yamyamo e nder nokku mum en.
E nder ɗuum, sanɗaaji keewɗi nanngaa, woɗɓe ndiiwaa e mudda walla haa cay e fawaade e kuugal diiso nehdi ngo rewaani laawol, luulndiingo doosɗe duɗal ngal. Sanɗaaji ina ɓeydoo saasde e daɓɓugol hujjaaji, laamu ina ɓeydoo neegde e maɓɓe, ina ɓeydoo nanngude ɓe. Hay gooto noon faamaani tawo hol ko saabii ngal ɗoo piggal muusngal tiindinaa tan ko e sanɗaaji fedde SNEM. Ɓurii ɗoon bonɗe sibu, e ballal persidaa duɗal ngal, polis waawii heɓde seeɗanteeje binndagol terɗe SNEM.
Ñalnde talaata 21 feebariyee sanɗaaji 6 nawanoodi to porkireer paanaama kasoo, ina padi ñaawoore. Awokaaji pellitɗi wallitde musidɓe amen ɓee, kollitii wonde ɓе leptaama, ha ɓe keɓtini ɓe mbaɗii bonannde nde ɓe mbaɗaani. Sanɗaaji jeyaaɗi e yiilirde SNEM nanngaaɗi e komisariyaaji polis, leeptaama, mbaɗaa golle ittooje neɗɗaagu, koynooje : haɗeede ɗoyngol, findineede hakkunde jamma ngam naamneede, uddeede e niɓɓuru tawi ina ɓoorii, ina tonngaa, piggal matarakuuji, cuumgol yeeso, kuutoragol petelaaji loowaaɗi e paakaaji ngam hulɓinde e gijaade koreeji sanɗaaji dummbaaɗi.
Fawaade e geɗe limtaaɗe dow ɗee fof, dental senndikaaji 5 sanɗaaji ɗii ina siftina :
- wonde faandaare geddo mum en ko jooltugo ! hujjaaji sanɗaaji,
- wonde sanɗaaji mbaɗaani ko takkaa koo, so jaɓɓugol araaraay leydi ndii, yande walla ƴattaade jannginooɓe ;
- wonde saabii ɗum geddude kawgelaaji, go’o, ko sabu fiyakuuji jangde. Sibu, hol no ɓe mbaɗirta kawgel tawa ɓe mbaɗaani TD walla ɓe ciynaani ɗum ko adii ? Ɗiɗi, min pellitii salaade kawgel ɗoon ɗo musidɓe amen ndiiwaa e dow fenaande. Ko ɗum addani min suurtude no doole amen potirnoo nangle keertinaaɗe e yiilirde siynoore SNEM, sibu wonaa kankо tan yahi gerew.
A min ceyfita no doole amen potirnoo piggal nanngaaɓe ɓee piyetee ngal, luulndingal sarɗiiji pawgol yitere (garde à vue), kam e yiɗde laamu nguu fawtude cumgol biisuuji STP e keeci SNEM.
E min kollita mettere amen e darnde laamu nguu, sabu mum nooynaade ɗaɓɓaande pelle renndo e partiiji politik e yummiraaɓe e ɓesnguuji jaggaaɓе ɓее, ko noon ne kadi min ceyfitirta golle bonɗe ɗe sukaaɓe rewɓe nanngaaɓe ngolleteе ɗee.
E min pooɗta hakkillaaji renndo ngoo e hafeere Koolaaɗo Kuuɓal SNEM mo min nananaani hay dara, min nganndaa ɗo woni e oo ɗoo sahaa. Bonannde ina heti Bakkari Baccili sibu polis ina yiyloo mo. E min eeroo denndaangal doole guurɗe ngenndi ndii, mbele aɓe mballa min. E min ɗaɓɓa e denndaangal sanɗaaji Muritani, ɗo mbaawi wonde fof, nde mballata min e dartaade ndee fenaande nde laamu nguu fewji ngam rumtinde hakkillaaji yimɓe caɗeele teeŋtude leydi ndii wondi hannde ɗee, kam e cuggugol laamu nguu.
Ɓamtugol jangde walla juɓɓingol kawgelaaji foti wonde tan ko caggal nde jaggaаɓе ɓее ngoppitaa, riiwaaɓe ɓee ƴettitaa, hujjaaji amen ñawndaa.
Nuwaasoot, ñalnde 23 feebariyee 2012.
Dental senndikaaji :
- -Le Syndicat du Flambeau Estudiantin (SFE)
- L’union libre des Etudiants Mauritaniens (ULEM)
- -Le Syndicat National des Etudiants Mauritaniens (SNEM)
- -Union Alternative des Etudiants Mauritaniens (UAEM)
- -L’union Autonome des Etudiants Mauritaniens (UAEM)
