Jaagorɗo geɗe Nderndere Senegaal uddii jooɗorde AJ/PADS… Landing Sawaane e yimɓe mum mbaawaa heen naatde. Decroix joɗɗinii kawtal senngo mum e darorɗe lewru Suwee ɓennundu ndu. Landing Sawaane maa joɗɗin kawtal mum e lewru Deesambur fayndu. Terɗe kowhowe njaltii AJ/PADS, cosii Yoonu Askan Wi e gardagol Majeey Mbooc, heddiiɓe njantoyii e APR, heerto Makki Sal. Ɗee dille fof ko firtaare AJ/PADS tan. Senngo Decroix suɓiima Decroix Koolaaɗo Kuuɓal e kawtal maɓɓe jooɗingal ñalɗi 12 e 13 e14 Suwee 2009.Ɓee yeftii kuule nay guurtinooje heerto maɓɓe. Gadanal ngal yowitii ko e edda Koolaaɗo Kuuɓal dottantee, ko laaɓi ɗiɗi tan diwataa ɗoon. Kuulal diɗmal ngal ko edda fof diwataa duuɓi joy so heewi. Yanti heen ko kala tergal heerto ngo ina waawi dikkaade fiilngo Hooreejo Leydi hay so o wonaa gardiiɗo heerto ngo. E wattan, so terɗe keewɗe njiɗii dikkaade fiilngo Hooreejo Leydi, ko fiilngo adanngo waɗetee nder heerto ngo, ngam suɓaade heen gonoowo.
Kawtal tayondiral. E wiyde maɓɓe, ngoo waylo ko salaade neɗɗo gooto tan jogoo dental maɓɓe. Maa ɗum falo kadi caɗeele jolooje hakkunde terɗe, hono ko kewi hakkunde Decroix e Landing ko.
Kawtal laaɓtere. Muhammadu Daf, gooto e wonanɓe Decroix hollirii kawtal ngal ko ngal terɗe timmude nder AJ/PADS, wonaa yimɓon ɓiɗɓe-naange. E wiyde makko, ko ɓuri heewde e cate nder leydi heerto ngo, tawtoraama kawtal ngal. Mbele ɗum ko goonga ? Eɗen mbaawi sikkitaade ngati sikke alaa ko ɓee feƴtiiɓe.
Ɗum fof dey holliraani ko woni tigi rigi caru njolngu nder fedde AJ/PADS, fedde hormanoonde nder Senegaal e ko yalti ɗum. Ɗee caɗeele ina njiytoo e seengooji tati : koolondiral natii, fooɗanaade gardagol, waasde jogaade laawol laaɓtungol.
Nde sabu njelaari ndi Abdullaay Wad gonduɗi e mum, mo woni e maɓɓe yiɗi ko ɗum rewra e juuɗe mum. To AJ/PADS. Wad suɓii Decroix, Landing tikki. Ndeke ngoroondi koolondiral ngal ummii ko e ceede e dañal. Hannde nder Senegal e Afirik, sosde heerto dawrugol wayi ko no sosde goomu faggudu nii. Heerto heen fof holla doole mum mbele ina waawa ɗum ƴeewde njaru naftoowu jiifa mum. So heerto wakilitere alaa kadi laawol laaɓtungol, reftata heen ko sordinde. Decroix takkii Landing wonde kulɗo fiilngo demokaraasi. O wiyi haa jooni o nangtii ko e miijooji ɓuntuɗi ɗi kitaale 80, jiɗɗo heɓrude laamu doole nguurndam suuɗaare haa jooni ko ko rewaa. E nder kawtal he, alaa fof ko Decroix takkaani Landing, o wiyi ko o kulɗo reedu, o alaa yaakaare, ekn. O wiyi « saanga fiilngo 2007, konngi [AJ/PADS] cañaaki. Ngati, holi no ɓe maaldondirata e Hooreejo Leydi duuɓi jeeɗiɗi haa njahdi e naange, ɓe ngonaa hoohooɓe Jaagorɗo leydi, ɓe ndennda dawrugol … ɓe ngarta ɓe caloo renndude njeñtaari ? ». Ɗum ina jeyaa e ko ina tinndina ngumndam Landing Sawaane e ko fayti e dawrugol, ɗum kadi ina jeyaa e ko addani ɓe heɓde ko nafataa e filngo 2007 ngo. Hoto njejjiten noon ko kanko Decroix wonnoo gardiiɗo jeeyngal nde Landing yiylotoo fiileede Hooreejo.
Gawlo laamu Wad
Konngi Decroix fof nder kawtal ngal njahri ko yettude Abdullaay Wad e laamu mum. O yahdaama heen ha o wiyi alaa ɓurɗo Wad anndude caɗeele gonɗe nder AJ/PADS. Holi mo haalani mo ? O etiima welditinde Landing e Decroix. Ko o laamɗo peertuɗo mo hono mum weeɓaani nder Senegaal. Decroix daranii limtude ko Wad gollii, gila e laaɓi haa heɓi ñamiri demokarasi e golle makko nder Afirik ko wayi no Muritani (?) Decroix wontii ɗoo gawlo AbdullaayWad. E nder lewru Deesambur 2009, senngo AJ/PADS ngo Landing Sawaane, maa jooɗo nder kawtal mum. Landing suɓee Koolaaɗo Kuuɓal heerto ngo. Wona AJ/PADS dañii mawɓe ɗiɗo, mo woni fof fooɗanoo jeyde innde « AJ/PADS » nde… kareeli goɗɗi ummanee.
Aamadu Malal Gey
Fooyre Ɓamtaare – Ndakaaru
