Maayde Sedenne wul Abdel Vettah jibinii sunaare mawnde e ɓesngu makko, e sehilaaɓe makko, e denndaangal annduɓe mo. Gorko ngenndiyanke, lolluɗo. Neɗɗo udditiiɗo, kaɓaniiɗo nuunɗal e ngootaagu Muritani he nguurndam mum no diidorinoo, teddinɗo cehilaagal, banndiraagal, korsinɗo pinal, e naalankaagal, e coftal ɓalli, e wiyde Biraan Hammaat Wan.
Fiɓnde makko e wonde mo baawɗo, kaɓɓiiɗo e cehilaagal. Yeru cehilaagal makko tiiɗngal e Njawwar Kan (Yo Alla yurmo ɗum, yaafoo ɗum), mo nganndu-ɗaa seerndi ɓe tan ko maayde. Sehilaagal maɓɓe, gonngal e nder ñaawgol daartol Moritani, ina maantiniri banndiraagal ɓurngal heewde luural renndo e darnde renndo ngam ngootaagu ngenndi, demokaraasi, e nuunɗal renndo.
He kollitgol deftere Njawaar winndunoo, tiitoriinde “le fleuve refuse de séparer » (Maayo wonaa keerol), Sedenna woy, siftorde taccingol sehil makko, e hitaande 1989. Bojji gummiiɗo to woɗɗi he ɓernde makko, teeŋtinooji o yejjitaani gaañanɗe ɓerɗe. Ɗum ko huunde seedtotoonde kaɓɓagol maɓɓe e ɓiyngu yummaagu hakkunde capaato e pullo, hakkunde safalɓe e ɓaleeɓe. Ko maayde tan seerndi ɓe e fiɓnde renndinnoode ɓe : kareeli maɓɓe ngam ngootaagu ngenndi, e nuunɗal nder renndo, demokaraasi e yaajeende nder Muritani.
Fedde Ɓamtaare Pulaar he Muritani jogoraani yeddude ngol tonngol seedantaagal Biraan Hammaat Wan waɗi he makko ñalnde 18 oktoobar 2026. FƁPM ine siftora nootagol makko he kewuuji mum, haa teeŋti e diidngo galle Pulaar ñalnde 23 settaambar 2025 (yimɓe fof ceediima natal makko, omo woni yeeso hoohooɓe tawanooɓe ngoon diidngo). Ɗum noon, FƁPM e denndaangal terɗe mum e yiɗɓe mum, ine nduwanoo mo battane moƴƴe, e duumagol makko he Aljanna haa abada. Yo Geno yurmo mo, yaafoo mo, yo juuɗe moƴƴe njaɓɓo mo. Yo Alla haarnu ɓe aljanna.
Fooyre Ɓamtaare
