Catal FƁPM Suwoyraat
Ñalnde 30/11/06, catal Suwoyraat mawninii ñalawma windereyankeewo peewtuɗo e VIH/SIDA e ballondiral e Fedde rewɓe Mawɓe Galleeji to leegal EGB. Terɗe jiilirde ɗiɗi ɗee fof tawtoraama kewu o. Kala geɗe jowitiiɗe e Sidaa njeewtama heen : Ko woni ñawu ngu, no ngu heɓirtee, no ngu reentortee, hol ñabbuuli njogoram goɗɗi, hol no yimɓe wonduɓe e ñawu Sidaa nganndirtee, hol no wonduɓe e ñawu ngu poti toppitireede … Yeewti ɗum ko haralleeɓe cellal ɓeeɗoo : Mammadu Gelaajo Paam, Umar Baay Sih, Maymuuna Caam, Alasan Bah, Mayram Booy. l Catal ngal neldii ko fawanoo e mum ngam mawningol hitaande 30ɓere FƁPM
Kabaruuji pelle goɗɗe
Tabital pulaaku hakkunde leyɗe : njillu Aamadu Siisee : Musiɗɗo Aamadu Siisee, Koolaaɗo Kuuɓal Duumiiɗo Fedde Tabital Pulaagu Hakkunde Leyɗeele (TPHL) yilliima Nuwaasoot, tuggi 11 haa 12 lewru mee 2006, e dow haaju makko keerii- ɗo. E nder heen, o heɓii jokkondirde e pelle toppitiiɗe pinal e nder Nuwaasoot, ñalnde aljumaa 12 /05/2006 tuggi waktuuji 5 kikiiɗe haa waktuuji 10 jamma, galle Aamadu Umaar Jah, hoyreejo Fedde Ɓamtaare Pulaar e Muritani. Yimɓe 25 tawtoraama jonnde nde. E jokkondiral he, Musiɗɗo Aamadu Siiseee haala ndaɓɓa nafoowa hollitii ngonka TPHL maa Tabital Pulaagu International, e nafoore mum, e njentudi jonnde huuɓtidinnde fedde e nder lewrufeebariyee 2006, e yamiroore noddude jonnde woɗnde ñalnde 8 e 9 sulyee 2006to Bamako. O jaabiima denndaangal naamne ɗe tawtoraaɓe ɓe naamnii mo peewtuɗe e Pulaagu e kuuɓal, haa arti e fedde TPHL. 9eew natal makko, e konngol makko e nder jonnde he.
NODDAANDU TPHL : E nder ɓataake mo T°001/TPI/P/2006 binndaaɗo ñalnde 11 mee 2006, e wuro Bamako, Hooreejo TABITAL PULAAGU HAKKUNDE LEY;EELE, hono Musiɗɗo Kaadiri Yaayaa, ene noddi joɗnde huuftidinnde fedde nde to Bamako (Mali), ñalnde 8 e 9 lewru sulyee 2006. Ginol Golle joɗnde nde ko nii siforii :
- Ciimtol golle Hooreejo fedde
- Ngonka Tabital Pulaagu e nder kala leydi
- Yuurnitaade Doosɗe e Sarɗiyeeji Ndernderi fedde nde
- Toɗɗaade yiilirde hesere
- Heblude Tuugnorgal golle fedde nde Hiirde pinal ma yuɓɓine e dumunna jonnde nde. Hawraama sete leydi fof yo won yimɓe tato (tawi heen gooto ko debbo).
Leydi fof jogotoo fereeji nelaaɓe mum, to bannge daabaaji, e ɗuhorde, e ñaamdu. TPHL noon jogotoo tan ko fereeji juɓɓingol jonnde ndee, e nder wuro Bamako.
FEDDE DENTAL PELLE NAALANKOOƁE MURITANI : Ngam fuɗɗaade maa hurmbitde golle mum, Fedde Dental Pelle Naalankooɓe Muritani yuɓɓinii kiirɗe ɗiɗi pinal, to Galle Sukaaɓe Kiiɗɗo to, ñalnde 09 e 10/06/2006. Nde bismiima heen F.Ɓ.P.M., hooreejo fedde nde tawtoraama kewuoo (heen jamma gooto). Naalankooɓe heewɓe njirwinii hiirde nde e pulaar, e wolof, e soninke. Tawtoraaɓe ɓe mbeltiima heen sanne. Eɗen njetta ɓe kaaɗdi
DENTAL PINAL CEERNO NJAAY BAH : Ñande 08/06/2006, Kalifu Geɗe Nderndere, e fawaade e rusi mo T° 0160 ciifaaɗo ñalnde heen, heɓtinii fedde pinal nde wonaa laamuyankoore hono: DENTAL PINAL CEERNO NJAAY BAH. Fedde nde sosaa ko ñalnde 19/02/2005, e wuro Bahbahɓe. Ende golloo e nder Bahbahɓe kam e Nuwaasoot. Faandaare mayre ko : haɓde e humambinnaagu, e majjere, e baasal ; jannginde pulaar e arab ; yuɓɓinde jeewte diineyankooje, e ñiɓde ɓesngu ngu e nder diine lislaam.
F.Ɓ.P.M. ene yetta denndaangal terɗe fedde nde, ene duwanoo nde nguurndam moYYam mbele ende waawa daranaade oo ceerno mo Fuuta fof seedii golle mum, hono Ceerno Njaay Bun Umaar Bah mo Bahbahɓe Looti. Yillirde Dental Pinal Ceerno Njaay ko : Mammadu Bookar Lih (Hooreejo), Miikaa Faal (Koolaaɗo Kuuɓal), Abdullaay Usmaan Bah (Kalfinaaɗo Ngalu).
