Ɓe mbiyi mo: « Ko goonga, ɗum noon min njaɓii ! » E oon sahaa aadiyankaagal ene woodi, ndimaagu ina heddii ! Heen gooto fof garɗo, won heddiɓe caggal mum, nde o hooti, o yiyondiri e ɓeen, ɓe nanondiri. Ɓe idii fof ko yeftude laawol, eɓe ƴeewoya Satigi Suley Njaay Mawɗo (laamɗo Deeniyankooɓe e oon sahaa). Nde ɓe njahi to Suley Njaay, ɓe ngari, ɓe tawi ko omo resi rewɓe sappo. Ndeen Suleymaani Baal arii, o wiyi : « Aan Suley Njaay, aɗa anndi ko addi mi ɗoo ? Addi mi ɗoo ko mi nanii aɗa resi rewɓe sappo, etee ɗum wonaa laawol ! Rewɓe sappo, laawol diine yiɗaa ɗum ! Suley Njaay wiyi: « Miin, hol ɓeen rewɓe sappo ? Miin kay, so mi yiɗii mi resa rewɓe sappo ! » Suleymaani Baal wiyi mo: « etee mi nanii aɗa ɗo resi rewɓe jiidube yumma e baaba ! «
O wiyi: « Eey ! Miin ndes-mi ɗo tan ko Ummu Maajuura, e Kummba Maajuura, etee ko seɓɓe Koliyaaɓbe, ko …ko … ko horɓe am tan ! Seɓɓe Koliyaaɓe ɓe kaawaa, mbiyi: « Eyyoo… ! On nanii Suley Njaay ! Eɗen njaha, eɗen mbarondiree haa o laamoo, ndeke o jaggiri en ko en jiyaaɓe ! Ɓe pelliti ɓe laawii, ɓe mbiy: « Ndewen e oo Ceemo ! » Ɓe ndewi e « Sheex Suleymaani Baal. Seɓɓe Koliyaaɓe ngonnoo reenooɓe makko, ɓeen ngonnoo jagge makko tigi rigi, kono ɓerɗe mum en taayi e makko e oo ñalawma, sabu o nanngiri ɗum en ko jiyaaɓe. Suley Njaay wiyi kadi seerataa e rewɓe ɓe fof. O waɗdi e Suleymaani Baal « moyуii… maa laaɓ! te jooni alaa ɓe o wondi. Seɓɓe ɓe, ko ɓeen kaɓetenoo, ɓeen noon jooni njahii. Suley Njaay ummii ɗoon, o wiyi omo yaha wuro Tulel. O nawori kaŋŋe, mbele ma won ɓe o soodi toon, ngonana mo, wooda kam ɓadtii ɓe mo, wooda reenooɓe mo, o waawaa feewnitaade.
Suleymaani Baal e ganndal mum ruttii, jooɗii. Suley Njaay jokki laawol mum, ene wondi e subalɓe. Omo lelii tan omo ajjii e hoore laana, subalɓe ina ngawƴa. Suleymaani Baal e ganndal mum waɗdi mo e baawal (baawngal). Baawal ngal ina ɗapɗapina tan e hoore laana. Suley Njaay ina ajjii tan noon, ina ƴefti fetel, ina fawi e reedu mum. Baawal ngal ina ɗapɗapina, ina ɗapɗapina tan e hoore laana, haa juuti, tan Suley Njaay roŋki muñde. O wiyi: « iijam… Onon kam, ngal baawal ina haɗa yimɓe tan awƴude! Ɗoon tan o jippini fetel, o toɓɓi baawal… conndi oolii, fetel dajjitii, fappii e junngo makko, junngo ngoo saa mi e nder laana. Baawal nana yaha… ! Nde juungo ngo taƴi, tawi ko laaɗe makko ina njoofa e tufnde Waali Jantaŋ. Owiyi yo laaɗe ɗe njilte.
