Muhammadu Baaba Sih gonnooɗo Kalfinaaɗo ngalu catal Fedde Ɓamtaare Pulaar (FƁPM) Kayhayɗi sankiima ñalnde njeslaare 15 duujal 2024, to Kayhayɗi, saanga wetndooga, caggal rafi daɓɓo. O sankii ko opitaal Kayhayɗi, o wiirnaa ko ñalnde heen caggal juulal takkosaan, nder genaale Killinkaare. O dañii keewal no feewi, ko moƴƴi haalaama e makko, haa teeŋti e hoɗdiiɓe makko : teskuya gadano : Ceerno Muhammadu Baaba Sih mawni ko Magaama he nder galle kaaw mum Sammba Sih, kono o ɓuri ñiiɓde ko he Kayhayɗi. Ko o neɗɗo juulɗo, jamyamo, tedduɗo, mo alaa fitina, jokkoowo enɗam, coftuɗo. Catal Kayhayɗi waasii tergal coftungal, kisnunooɗo ngalu, keɓiiɗo mo alaa ayiiba. E konngol Daawuuda Sammba Ndonngo, gooto e terɗe catal ngal : « mawɗo hannde jahroowo duuuɓi makko ɗii, e to ñiiɓirde nde woni too hakkunde mum e galle makko, ko ina abboo kiloomeeteruuji ɗiɗi, daagitoo ara, wonaa huunde weeɓnde, ko wonde katante waɗata ɗum, wonde kadi ɓuuɓɗo, mawɗo keccuɗo en, enen fof, jibini en, o jooɗdoo e men batu, o waasa haljinirde en, o jaɓana en to peeje e miijooji … ɗum weeɓaani ». Nguurndam makko fof o duusii FƁPM catal Kayhayɗi. O yahii, kono o ɗaccii golle moƴƴe.
Muhammadu Baaba Jibinaa ko e hitaande 1955 to Magaama e Liitaama, ko o jannginoowo he duɗe les, o jannginatnoo ko ɗemngal Arab. O dartini golle to bannge laamu ko e hitaande 2016. O jannginii Magaama, diiwaan Mbuut, Ɗalhaya e Kayhayɗi, o jannginii sanɗaaji keewɗi e dow yarlitaare. Ko o daartiyanke, omo anndi ko heewi e Fuuta.
Fedde Ɓamtaare Pulaar e Muritani, haa teeŋti e catal Kayhayɗi, ina nduwanoo ɓesngu makko : yo Alla yuurmo mo, yaafoo mo, yo Alla haarnu mo Aljanna, kanko e maayɓe juulɓe fof.
Usmaan Ñaan, hooreejo Catal FƁPM Kayhayɗi
