Miñiraaɗo tedduɗo, bartaniiɗo leñol mum, hootii sahre-goonga, tawi leñol mum rewaani ɗum ñamaande. Sabu o ŋaññanooki e darnde makko e ɓamtaare maggol. Debbo fof e senngooji ɓamtaare Pulaar, Jalliis fiyii ɗoon paafal mum ngal momtotaako haa leydi taggee ɓaaree. Ceedtorɗi am e oo miñiraaɗo paarnorɗo leñol ko ceedtorɗi ɗi ngalaa guli, sabu yontidaaɓe makko fof ina mbaawi seedodaade e am wonde ko o maayannooɗo leñol makko, dokkunooɗo ngol fof makko. Min ngadii anndindirde ko tawi omo jannga e kolees, omo woni suka tokooso, kono juɗiiɗo law e yiɗde pinal e ganndal e finaa-tawaa makko. E fedde Jaalal Mbooyo o nokki jeyngol, yeru no Hammee Aamadu Lih, jaayndeyanke men ŋanaa. Ɓe cappitoyii mbaawka maɓɓe e pulaar e duɗe SAED gudditanooɗe e Mbooyo e gure goɗɗe e Tooro, tawi ko tappamaaje. Jalliis ina jokki woppaani haa wonoyi jannginoowo e eɓɓooje ɗe ngonaa laamuyankooje. E gure ɗe o jannginrunoo, gaa gaa janngingol ngol, o daranii wiɗtude gure : daarol mumen, finaa tawaa mumen, …
Nde o waɗti hirjinde e yeewtude e rajooji, gila e teeru haa e dowri, o ɓeydii juɗaade e darnude pelle, ngam ɓamtude pulaar, sabu omo faami ko waɗetee koo fof, ndaɗɗudi ko waawde janngude e winndude ɗemngal ngal, nde goɗɗum fof fawoyoo heen. To bannge jikku, Jalliis ko kaaraysire, baawɗo teddinde mawɓe mum, jiɗɗo enɗam mum, belɗo, beeɓɗo kono kadi laawortooɗo kala dariiɗo e yaɓɓude hujjaaji leñol makko.
O alaano e ɗuum maslahaa hay ko foti no ceeɓdi giyal. O waɗaano ɗemngal makko e poos, o fiyatnoo tan ko ɗo ranwata e mbaggu ɗoo. Seede ɗuum ko jeewte makko dingire, e rajooji haa e jime makko, o mooftataa hay huunde ko woni e becce makko. Jalliis hootii sahre Goonga, leñol mum rewaani ɗum ñamaande. Sabu golle mum lobbe pattamlame, ŋarɗuɗe no puɗal naange Afrik, maa nduus en e njuuteendi jamaanu. Ablaay, miñam, lollirɗo Jalliis, yoo Geno jaɓɓo to ɓuri toowde e Aljannaaji, ngam gilɗi maa e Annabiijo Alla Muhammad, e yiɗde ma leñol maa, sabu haɓaade e maggol majjere e baasal e kiiɓal.
Kuɗol : Aamadu Tijjaan Kan
