– Won ko wonnoo ɗoo Wonnoo ɗoo
– Ine wona, wonataa ko tinndol
Ko fowru e mbeewa.
Subaka law, mbeewa ina iwra funnaange, fowru ina iwra hiirnaange. Ɓe kawri e nder guumi cukkuki. Mbeewa tinaani, fowru tinaani, haa gite maɓɓe kawri.
Mbeewa wii : « Hii, subaka am bonii hannde ! » Fowru ndaari mbeewa. Mbeewa ndaari fowru.
Fowru wii : « Aaha, hannde kay subaka maa bonii ! » Fowru wii : « So a haalii goongaaji nay, tan mi accete, mi waasa warde ma. »
Mbeewa wii : « Ñaamam tan, ɗum woni e maa. » Fowru wii : « So a haalanii kam goongaaji nay, mi ñaamataa ma. »
Mbeewa wii : « Sinno Alla anndinii kam aɗa rewa e ngol laawol, mi rewataa heen. » Fowru wii : « Aaha go’o, a haalii goonga. »
Ba wii : « Ɗiɗaɓel ngel, so mi yehii wuro mi wiyii yimɓe ɓee, mi hawrii e fowru accii kam, ɓe mbiyata ko fenaande, ngati a alaa nguun ndimaagu. » Fowru wii : « Ɗiɗi, a haalii goonga. »
Mbeewa wii : « Tataɓel ngel, sinno joomam anndiino so mi oorii hannde miɗa hawra e maa, ko e ɓoggol ñallat-mi. » Fowru wii : « Tati, a haalii goonga. »
Mbeewa wii : « Nayaɓel ngel, so a yiyii haala men kaa juutii tan ko aɗa haari. » Fowru wii : « Nay, a haalii goonga. Jooni-jooni, conngu-mi ngaari, ñaam-mi haa ngoppu-mi teewu. Yah, mi accii ma. »
