Min kaaliino ɗum e binndanɗe jawtuɗe, hollude sagataaɓe walla ɗaɓɓirde ɗum en, nde kuccanta liggaade e ɗee ɗoo dame dañirɗe ɗiɗi, tammbiiɗe nguurndam e nder Aduna hee. Min kolli ngonka men e nder leydi ndii, woni wuurde e ko ittaa caggal leydi, no wayi tampinde ɓesngu nguu; e heege e caɗeele ɗe ɗum addani yimɓe ɓee, woni : yowitaade e ko woɗɓe peewni tawa kañum en ene mbaawi feewnande koye mum en ɗeen geɗe : woni ko Paafal e Caafal, no mbiy-ɗen nii, tammbii koo. Leydi moƴƴiri ina woodaa, durngol ko hono noon. Ko heddii, ko ɗum daranee, yahdinee e sokla yonta kaa e jeese mum kala.
En njiyii hannde oo, rafi Korona ko addani en e caɗeele, nde wiyaa yo yimɓe njeedtu, ko iwatnoo caggal leydi, nde natti arde walla ustii maa coodgu mum ɓeydii. Ɗuum jibinani yimɓe baasal e caɗeele, nde wonnoo ko yowitiiɓe.
Miɗen ciftina sagataaɓe ɓee, yo njiylo wonde yontaaɓe; nafooɓe yonta mum en. Ndunngu arii nani ! Leydi moƴƴiri nani ! Yo ɓe koccu kaɓirɗe demirɗe, ɓe kuccana demal. Wiyaama: « so sagata remaani yaha ko ɓuri casol mum ». « So neɗɗo wammbaani naange, roondoo nge ». Nehgol jawdi e ndiwri (gertooɗe…) yoo darane, yoo njeñtin Kosam e teewu koko hatojinaa no feewi sanne ; yoo huccane ko neɓaani. « haa ɓuuɓa leelanii keyɗuɗo ».
So wontii hannde, kadi, caggal ariwaasuuji e leɗɗe ɗe hay gooto anndaa ko ngoni e no peewniraa e ko peewniraa, yimɓe ina neldee yoo cafroro, tawa ina njooɗii ina ŋaaɓi kunuɗe ina puttini gite, ina mbayi no najɓe nii, tawa alaa ko pirti ! Alaa e sago kaaɗoo ngonka firtee haa laaɓa cer !!! Yoo Sagataaɓe rewɓe e worɓe culmo dañal, woni riiwde baasal tawo tuugnii ko e ganndal e rewrude ɗemɗe mum en. Karallaagal paytungal e ndema e nehgol jawdi… njanginiree ɗemɗe men; mballitiroo ɗemɗe goɗɗe. Ko ngool laawol foti reweede. Yo ɗum sakkane pewje e dokkondiral juuɗe, ngam siynude ɗum. Ko pellital tan ɗum sokli. Pulaar wiyi: « ko fehre waɗi fedannde kono ine yaroo ko leele ».
Yoo yontannde ndee anndu hawri ko e yonta caɗeele ɗe rafi Korona addani kaa, ɓe poti ko daraade, kamɓe sagataaɓe, darnde laŋ, ngam faabaade ɓesnguuji ɗii e ɗee caɗeele dookɗe ngu, ɗeen: ngoni mawngal ñabbuuli e ko jokkii e mum. Yimɓe yo ngon wallondirteeɓe; caloo wonde yowitiiɓe. So jowitanooɗo woƴaama hoyre mum, anndu jowitiiɗo kam lorlat. Ko e ngeen naange ngon-ɗen hannde. « So heege warii joom galle, fehre feppi bona ». Ko Pulaar haali ɗum.
Ñalnde 14 korse 2021
Sileymaan Kan
