Pelle ɓamtooje ɗemɗe Pulaar, Sooninke e Wolof njuɓɓinii ñalnde 28 settaambar 2019, ñalngu to Wero Pinal Jaaje Kamara, to Socogim PS, nder Nuwaasoot laamorgo leydi Muritani. Faandaare joɗnde ndee wonnoo ko renndinnde mbinndaaɗe kujjinaali laawɗingol ɗemɗe ngenndiije ɗee kam e naatnugol mum en e nder Tippudi Nehdi e Jaŋde leydi ndii : hono hujjinaango 2008, hujjinaango 2011 e hujjinaango 2017, ngam waɗtude ɗum winndannde wootere huuɓtodinde.
Haralleeɓe pelle tati ɗee, kam e pelle pinal goɗɗe ina tawtoraa joɗnde ndee. Ñalngu nguu yuɓɓinaa ko e ballal FONADH (Dental pelle daraniiɗe jojjanɗe aadee kam e GIZ). So winndannde ndee gaynii yuɓɓitineede, maa pelle ɗee jooɗto ngam ngam sakkude peeje no caaktiri nde e ɓengu hee kam renndo ngoo no diidorinoo, mbele ina mballita faamninde laamu nguu wonde laawɗingol ɗemɗe leydi ndii fof ko huunde fotnde, wallitoore potal e ngootaagu ɓiɓɓe leydi ndii. Naattingol majje e nder jaŋde leydi ndii ko huunde wallitoore moƴƴinde jaŋde ndee, e rokkude denndaangal ɓiɓɓe leydi ndii hakke janngude e ɗemɗe ɗe muuyni.
Fooyre Ɓamtaare
