Ko huunde heewnde arde tee waɗa kulhuli mawɗi wonande neɗɗo, nde wonnoo ina hulɓinii, hay ƴeewde ɗum waɗi ɗum teskeede. Kono hol no naange nanngirtee, hol geɗe gaddooje nanngal naange ? Nanngal naange waɗata ko nde lewru reɗɗii hakkunde Ngaawe (Leydi) e Naange, kañje geɗe tati ɗee fof ɗe tolnondirat e diidol gootol.
Nde wonnoo hakkundeewol (diamètre) Lewru jaasi laabi 400 ngol Ngaawe, kadi yanti heen Naange ɓuri lewru woɗɗude Ngaawe (Leydi) fotde laabi 400, ɗuum waɗi kala nde Lewru reɗɗii hakkunde men e naange, endu waawi wirnude nge haa nge majja, jamma lomtoo.
Alaa e sago kadi Naange, Lewru e Ngaawe tolnondira rip nde nanngal naange laatoo e dow leydi, ko mbeelu lewru tan yanata e dow wertaango leydi niɓɓiɗa, ɗuum waawata gasde ko e maayirɗe lewru sabu ko ndeen ndu wonata hakkunde Naange e Ngaawe (Leydi), kono kadi wonaa nde lewru maayi fof naange nanngee…!
Niɓɓere nanngal naange fawii ko e ngoɗɗeeki hakkunde men e Lewru : so tawii ndu woɗɗitiima men ndu ronkat wirnude naange haa hawra, nge waya no jawo nih. So tawii ndu ɓadiima men noon e ndu waawi wirnude nge haa nge laaɓa.
Ganndal huurtii mbirniindi nannge, naange keborɗe aroyde, jooni annduɓe weeyo ina mbaawi anndude nde nanngal naange fuɗɗotoo, ɗo waɗata, ɗo niɓɓiɗta e nde gasata. Ɗuum waɗi njiyaa won heen ina ɗannanoo ƴeewoyde nanngal naange.
Maa wood wiyɓe ɗum aaɓnotaako, hono lewru wirnirta naange ? kono woto njejjitee hay newre junngo ina waawi wirnude naange, so neɗɗo ina hucciti e naange ina fooynoo, ko junngu mum heewi falnude nge.
Hammadi Jah
