E kampaañ woote ɓennuɗe ɗee, udditɗe ñalnde 21 suwee 2014, kanndidaa biyeteeɗo Muhammed Abdel Asiis oo, jamfinooɗo laamu jooɗii e jappeere e hitaande 2008 hade mum toɗɗoreede woote juɓɓiniraaɗe « ɗereeji ñenngaaɗi », hollitii tan wonde wonaa kanndidaaji keddiiɗi ɗii waɗdata. Waɗi noon ko e denndaangal dente ɗe o yuɓiinnoo e laamorɗe diiwanuuji ɗii, o aybini tan ko taƴiiɓe woote ɓee, “alaa ko o heddani ɗum en e kuɗdi e ƴattooje’’, e fawaade kay ko jaayɗe ɗee kaali, so wiyde ɓe, e yeru, « ɓee nayeeɓe … », « bonnooɓe », ɓe nganndu-ɗaa, e miijo makko, “mbaɗii ko boni, so taƴaade woote …”
Jeeyngal kanndidaaji keddiiɗi ɗii ne woɗɗaani ɗoon, sibu ɓe keewaani ñiŋondirde e koye maɓɓe, ɓe ɓuri waawde tooñde kamɓe fof ko saliiɓe yahde woote ɓee. Ɗumɗoon noon, ina ɗeɓa goongɗinde wiyatnooɓe wonde “yahduɓe e Abdel Asiis woote ɓee, ko e mum ngondi, walla kam ngoni ko e wallitde mo dagnude woote ɗuurnaaɗe.” Ɗum hollitii kadi, geddo ngoo muusii ɓe kamɓe kala, haa ɓe njejjitii wonaa e taƴiiɓe ɓee ɓe pooɗondirta lefol laamu ngol. Ɗum na hollita kadi ‘’kamɓe kala ɓe mbaɗdata ko e pelle politik e renndo gedduɗe ɗee, kono ɓe pooɗondiraani lefol laamu, sibu kamɓe fof aɓe nganndi hol keɓoowo ngol.” Baawɗe Alla ! Ɗoo dey yiyaa mbiruuji lammba ina ndikkoo yeeɓooɓe. Ngoo geddo muusii ndeke ! Ko e ngoon yeeso pot-ɗen faamirde winndannde PRDS Abdel Asiis (hono UPR) yaltini ñalnde alkamiisa 12 ndee, tawi alaa mo tooñata heen so wonaa FNDU. Nde hollitii wonde pooɗondiral lefol laamu woodaani, woni hare ndee ko limoore wootɓe e ɓe ngootaani.
To Kahayɗi, Abdel Asiis wiyi wonde “gedduɓe woote ɓee ko warkoyeeɓe, ko kam en taccini, ko kam en mbaɗi bonanndeeji añamnguraagu 89 e 90.” Baawɗe Alla ! Ko Ahmed Daddaa, walla ko Saar Mammadu, walla ko wul Mawluud, walla ko Haamiidu Baaba Kan, maa ko Masawuud, walla ko Mammadu Alasan Bah, walla ndeen ko Jamiil Mansuur ? Kanko Abdel Asiis, hol to o wonnoo nde ɗeen bone mbaɗetee ndee ? Ina anndaa o reenatnoo ko gardinooɗo ɗiin bonanndeeji oo, so Maawiyya. O jeyanoo ko ardiiɓe konu njooɓiingu ɓiɗɓe mum, hirsi ɗum en, waɗi ɓee yargo, werlii woɗɓe e oƴu jaynge !!! Kooli ko enen cuusi gacce, enen njoori gite ! Iih, hol kaɗɗo artiraaɓe e ɓaleeɓe muritaninaaɓe (haa teeŋti to Farayse) winnditaade ? Hol ɓoorɗo ɓe ngenndaagu maɓɓe ? Hol kaɗɗo ɓe heɓtude leyɗe maɓɓe, koɗorɗe maɓɓe, jeyuuji maɓɓe ? Mo wari Lamin Manngaan ? Hol berliiɗo e ɓee miskineeɓe, seppuɓe gila Ɓoggee haa Nuwaasoot ngam yiylaade haaldude e makko e hollitde mo caɗeele mum en, hol berliiɗo e ɓeeɗoo fotnooɓe jaɓɓeede, gerenaaduuji, tawi noon ñalnde kala ina jaɓɓoo seppirooɓe bolle puuyɗe, walla seppirooɓe ngañantumaagu to damal galle laamorgo leydi ?… Won ɗo o wiyi kadi, kanko kanndidaa Abdel Asiis, wonde « mi fottii e hoohooɓe heewɓe, ɓe meeɗaa nande innde Muritani ndee ko adii 2009 ». O haali ngolɗoo konngol ko Eeleega, o loowi ɗum ko e noppi Mawɗo Leydi mo o jamfinoo ñalnde 6 ut 2008, hono Siidi Wul Sheex Abdallaahi, oon pellitnooɗo artirde moolinooɓe, ƴetti kuule ittooje njiyaagu…
Nde o ari Kiifa, o wiyi wonde « war- koyeeɓe » ɓee, ko suusɓe wiyde wonde « bonannde (gabesi) » ina woodi hannde e leydi ndii. Ko ndeen o ruttii kadi e haala « Air Mauritanie », o yani e wul Waagef… Kono, Pulaar wiyi « ñalnde darnga, maa wood ko janngtaa ko wonaa nguyka gertooɗe » !
Bookara Aamadu Bah
