Dental biyeteengal Dental Mediteraane (Union pour la Méditerranée) sosaama ñalnde 13 sulyee to Pari (Farayse). Fotde capanɗe nayo e tato hooreeɓe leyɗe ina tawtoraa ngooɗoo sosngo. Fayndaare Dental ngal ko ƴellitde jotondire hakkunde leyɗe ɗoon diiwaan, woni leyɗe Dental Orop, leyɗe gonɗe worgo geec Mediteraanee, yantude e Muritani e Jordaani. Haa arti noon ko fayti e sato walla to bannge ganndal walla to yah-ngartaa yimɓe. Ngal renndini ɗum noon ko leyɗe 27 Dental Orop ɗe e leyɗe sappo worgo (Alaseri, Ejipt, Israayiil, Palestiin, Jordaani, Liban, Maruk, Muritani, Siiri, Tunisi e Turki) yantude e Albaani, Korowaasi, Bosni Hersegowin, Montenegroo e Monaako.
Ɗum ɗoo noon ko miijo Nikolaasi Sarkosi. E konngol ñalnde heen o wiyi : « eɗen poti gollodaade ko duumii ngam kisal men, ngam nuunɗal, ngam ƴellitaare, mbaɗen no Oropnaaɓe mbaɗnoo nii e tuma nde pellitta woppude kareeli hakkunde mum en. Ko enen kala ɓamdottoo, ko enen kala ngallidta ».
Wonande duuɓi ɗiɗi payɗi ɗii, ko hooreejo Farayse e hooreejo leydi Ejipt, hono Hosni Mubaarak ngardottoo Dental ngal. So ɗum ɓennii ɗiɗo woɗɓe kadi ƴettita, gooto Oropnaajo e gooto jeyaaɗo e leyɗe worgo Mediteraane. Denndaangal juɓɓule Dental nga ko noon ngardortee : gila e batuuji hooreeɓe leyɗe ɗe, haa e batuuji hilifaaɓe haa e goomuuji haralleeɓe ekn.
Batu mawngu ngu jooɗotoo ko laawol gootol duuɓi ɗiɗi kala. Joɗnde faynde ko worgo Mediteraane, rewnde heen to Orop. Joɗnde duumiinde Dental ngal toɗɗaaka tawo kono Portigaal e Tunisii kollitii yiɗde mum nde wona e leyɗe mum en.
Gardiiɗo leydi Libi, hono kolonel Kaddaafi jaɓaani ngalɗoo dental. Abdullaay ɓad, hooreejo leydi Senegaal kam ne ñiŋii ɗum, sibu e miijo makko, ngalɗoo Dental addata ko ceerungal hakkunde leyɗe Afrik, hakkunde Magreb e leyɗe Afrik keddiiɗe ɗe.
Bookara Aamadu Bah
