Fedde Dental Fodoore Tooro yuɓɓinii jammaaji ɗiɗi pinal e naalankaagal ɗo e Nouadhibou ñalnde 12 e 13 lewru suwee to sinemaa Jamjam (cinéma ɗemɗem) tawi yuɓɓinani ɓe jammaaji ɗi ko goomu pinal Lewru alaa faayoore e naalanke biyeteeɗo Siidi Bayel Caam e goomu mum. Jammaaji ɗii njahrii no fotiri sabu yuɓɓinaama heen ko heewi gila e jimɗi, tinndinooje, njalniikaaji ekn.. Banndiraaɓe Nuwaadibu nootitiima heen e keewal.
Eɗen njetta denndaangal terɗe fedde nde, nde mbaawi yuɓɓinde ɗii jammaaji. Eɗen teskii wonde:
Kiirɗeeli men ɗi keew-ɗen yuɓɓinde ɗo e Nuwaadibu e kala sahaa walla ko wonaa Nuwaadibu ina waasa yuɓɓude no yiɗiraa nii, sibu eɗen teskii wonde kiirɗeeli men ina leela fuɗɗaade sabu naalankooɓe men yuɓɓinooɓe kiirɗeeli ɗi, keewi ko jooɗaade haa ɗiɗaɓal jamma nde puɗɗoo arde; so ngarii keddoo ina mbaɗa giiri gaaraaji ko aldaa e gasde. Fijirde yiɗee yo fuɗɗo ronkee. So tawii fuɗɗiima tawata ko jamma gasii. Caggal ɗum ko to naatgol fijirde too woni ko yuɓɓaani hay dara : ko ɓittondiral, ƴiiñotiral mawngal hakkunde worɓe e rewɓe, sukaaɓe e mawɓe, waɗa gaañiiɓe, nguykaaji ekn…. naatooɓe fijirde poti ko yuɓɓude mbaɗa gori ɗiɗi, gorol rewɓe e gorol worɓe, adiiɓe ngona yeeso, garɗo fof jokkoo. Ko hono noon foti wayde ko wonaa ɗum ko yuɓɓaani. Caggal ɗum ko yuɓɓinooɓe kiirɗeeli ɓe so tawii nokku mo ɓe njogorii yuɓɓinde hiirde maa fijirde alaa to jooɗaa yoo ngaddu jooɗorɗe haa timma sabu so darnde juutii rewata heen ko hootde, so heewɓe kootii fijirde bonii. Eɗen ñaagii yaafuuya sabu en kaaldaani ɗum yiɗde ñiŋde.
Abuu Kan Nuwaadibu
