Taan Kajjata Siree Sammba Joom e Bakkaar Siidi Konko Siree Sawa Laamu, taan Ceerno Hamediin e Ummu Jeliyaa, Bah Mbaare Sammba Bakkar jibinaa ko e hitaande 1946 e nder galle lawakooɓe deeniyankooɓe Waali Jantaŋ, Waali gural Sule Buubu Gaysiri Dewal Sawa Laamu Yero Jam Koli Tengella. Yumma makko yalti ko e galle jeŋjeŋɓe, seernaaɓe wuro Ɓoggel Fadduwaa, wiyetee ko Habii Ceerno Hamediin Jeŋ walla Habii Ummu Jeliyaa. Baaba makko, kanko Mbaare, wiyetee ko Sammba Bakkaar Siidi Konko Siree Sawa Laamu Yero Jam Koli Tengella, jiidi ko e Boy Bakkaar, Jaanga Bakkaar, Faatumel Bakkaar e Ayse Bakkaar. Bah Mbaare ko saajo, rewi ko e funeeɓe ɗiɗo rewɓe Jeynaba e Sala. Omo jogii kadi mo o jiidi yumma tan, ena wiyee Bakkaar Mammadu Siidi Bah. Mbaare janngi duɗal mum leslesal ko Magaama. O ari ɗoon ko e hitaande 1953. E oon sahaa, o yahratnoo ko e duuɓi jeeɗiɗi. O woni ɗoon e Maqaama duuɓi 6. E hitaande 1959, o heɓdi seeɗanteeje ɗiɗi : seeɗantaagal jangde lesre (certificat d’études élémentaires)e kawgel fayde rogere ɗimmere (concours ɗentrée au second сусle). О ɓenni e duɗal rogere ɗimmere (collège) to Kayhayɗi. O woni ɗoon duuɓi tati. Caggal berwe e hitaande 1963, o fayti to liisee Rooso. E hitaande 1966, o heɓi bak makko. E oon sahaa noon hawri ko e leydi Muritani ena jiiɓii haa faayni, sabu baɗte pelɓondiral hakkunde almudɓe ɓaleeɓe e woɗeeɓе. Nde Mbaare heɓi bak, rokkaa « bursi » ngam jokkoyde jangde to duɗe toowɗe caggal leydi. E hitaande 1967, o ari e leydi mbiyeteendi Ikreen (Ukraine) to Dowlaaji Sowiyetik, o winndii e duɗal jaaɓi-haaɗtirde fanniyankaagal ndema e wuro wiyeteengo Kiyeew (Kiev). O janngi e ngaal duɗal duuɓi 6, o heɓi ɗoon seedantaagal toowngal biyeteengal doktoraa detaa to bannge safaara kulle (doctorat d’état vétérinaire) e hitaande 1973.
E hitaande 1974, o neldaa kadi to wiyetee Astarakaan (Astrakhan) haa hannde, to Dowlaaji Sowiyetik, fotde lebbi jeegom (siilo haa korse) ngam waɗde fanniyankaagal awo. Mbaare arti e Muritani, gollii ko heewi, caggal ɗum neldaa to Nante (Nantes) to leydi Farayse to duɗal ganndal e karallaagal awo geec, hakkunde hitaande 1975 e hitaande 1976. Mbaare, kañum fof e waɗde nguurndam mum hakkunde Waali, Maqaama, Kayhayɗi, Rooso, e to caggal leydi, majjaani ngenndi baaba mum Waali Jantaŋ. Omo anndi Soogoonde e Alaa-ñalaande. Omo anndi Boy mawndu e Boy tokosuru, beeli konuuji e ruggooji, beeli kure e gaawe. O majjaani Šammbammboo, beelal Haari-lewaa, Feel mawndu beeli, Maayel Tulel, Werowal, Nigali, Beedaaga e kolaaɗe Galñaade, Nduufti, Njaaw e Yeewgal. Mbaare heɓii, e nguurndam mum, gollaaɗe e ɗii nokkuuji :
- 1974 haa 1975 ko o biɗtoowo to waar Nuwaadibu ; laboratuawo
- 1976 haa 1978 ko o mawɗo laboratuwaar awo. Ko kanko kadi woni mawɗo gollorɗi fiiltiyankaagal e diƴƴiyankaagal to Nuwaadibu (chef du laboratoire des pêches et chef du Service océanographie et hydrologie ɗe Nouadhibou).
- 1978 haa 1980 ko o jiiloowo catal ngenndi ngal wiɗtooji fiiltiyankooji e awo to Nuwaadibu (directeur du Centre National ɗe Recherches océanographiques et des Pêches à Nouadhibou).
- 1980 haa 1981 ko o diisnondirɗo jaagorgal awo (conseiller du ministre des pêches).
- 1981 haa 1986 ko kanko jogii njuɓɓudi, woni kadi jiiloowo kuuɓal gollorgal hakkunde Muritani e Dowlaaji Sowiyetik biyetengal Maussov (administrateur, directeur général ɗe la Maussov)
- 1986 haa 2002, o waɗii e ngal daawal golle keewɗe. O wonii heen gollotooɗo e jaagorɗe awo e faggudu geeciyankeeru, o woni heen kadi meer Waali Jantaŋ.
- 2002 haa 2003, ko kanko woni jiiloowo kuuɓal kaggu laaɗe Nuwaadibu.
- 2003 haa 2005 ko o jaagorgal awo e faggudu geeciyankeeru (Ministre des Peches et ɗe l’Economie maritime).
- 2005 haa 2007, ko kanko woni meer Waali Jantaŋ.
- E 2007, o toɗɗaa senaateer falnde Maqaama.
- Tuggude e ñalnde 15 lewru seeɗto 2009 haa ñalnde 05 lewru ut 2009, ko kanko woni lomto hooreejo e jappeere laamu. Ko kanko woni ɓaleejo gadiiɗo jooɗaade e jappeere laamu ngam ɗowde leydi Muritani hay so tawii ko e lomtagol.
Yontaaɓe ɓaleeɓe heewɓe ndañiino teddungal e laamuuji leydi ndii kono alaa e mum en jettinooɗo martaba mo Mbaare dañi oo so wonde hooreejo leydi.
E hitaande 2007 nde Siidi Wul Sheek Abdallaahi toɗɗii mo haa ñalnde 11 lewru siilo hitaande 2013 nde o ruttii e joomiiko ndee, ko kanko woni hooreejo Senaa.
So tawii ko golle moƴƴe ngoni ndimaagu walla njibinta ɓinngu moƴƴaagu, mbiyen Mbaare Sammba Bakkaar faggiima geɗe ɗiɗi fof e nder sahaa mum. Hay so tawii won no o faamiraaka e ɗumunnaaji cakkitiiɗi ɗii, ittataa won ko o gollanii Waali Jantaŋ e diiwaan mum, leñol fulɓe e leydi Muritani e kuuɓal, ko ɓooygol aduna waawaa momtude. Maa ngenndiyankaagal tesko gonal makko Nuwaadibu e golle maantiniiee ɗe o gollii kono kadi maa daartol won seede mo yeddotaako wonde o wonii meer dañɗo ko meеruuji ndañaani.
O wonii jaagorgal dañngal ko jaagorɗe meeɗaani dañde. O woni kadi senaateer dañɗo ko senateer meeɗaani dañde tawo e nder leydi ndii gila nde ndii diidaa, so jooɗaade e jappeere laamu, ɗowa leydi ndii. Eɗen nelda duwaawu feewde e wuro Waali Jantaŋ e kuuɓal, denndaangal galleeji deeniyankooɓe e Yaalalɓe Waali, Bedenki, Siñcaan, Padalal, Ganngel e Ɓoggel. Eɗen ndennda sunaare e Boongal Seynabu Sammba Sule, Habii Mbaare Sammba Bakkaar, Jeynaba Sammba Bakkaar, Sala Sammba Bakkaar e Sala Konko Bah. Eɗen nduwanoo Mammadu Tuure mo Gori Jowol e Aamadu Baykoro Nan mo Waali Jantaŋ. Eɗen kuutoroo ɗoo kadi oo ɗoo fartaŋŋe ngam jaarde mo kanko Doktoor Aamadu Baykoro Nan e ballal makko teskinngal haa mbaaw-ɗen heɓde yoga e nguurndam oo ɗoo gorko. En njejjitaani giɗo men Kajjata Demmba Konko Mammadu Konko Usmaan Bah walla mbiyen mo Kajjata Sala Sammba Bakkaar Siidi Konko Siree Sawa Laamu Yero Jam Koli Tengella, baɗɗo jokkondiral hakkunde men e Boongal Seynabu, ruttii kadi humpiti en geɗe keewɗe ɗe en ngalaano.
Gelongal Fuuta lollirɗo, Njaay Saydu Aamadu
