Ñalnde aljumaa 11 Saawiyee 2013 subaka law, kabaaru ko gooto e nder Rajooji e teleeji Muritani ɗii kala, wonde Bah Mammadu lollirɗo MBaare, mawɗo Senaa Muritani sankiima to Farayse, caggal rafi cellal.
Hol gonɗo Bah MBaare?
Bah Mammadu lollirɗo MBaare jeyaa ko Waali Jantaŋ e nder tunndu Magaama. Ko e galleeji fulɓe yalyalɓe o yalti. O jibinaa ko e hitaande 1946. Ko ɗoon o waɗi jangde makko leslesre tuggi 1953 haa 1959. Caggal mum o waɗi kolees e liisee fof ko to Kayhayɗi e Rooso tuggi 1959 haa 1966 ; o jokki jangde makko to Dental Leyɗeele Sowiyetik, e nder duɗal jaaɓi haaɗtirde Siyaas ndema to Irkani e nder Kiew tuggi 1967 haa 1973, o heɓii toon seedantaagal Doktoraa Etaa e safaaraara jawdi. O waɗii estaasuuji to Nokku golle awo mo Astrakhan (to wiyetenoo URSS) tuggi saawiyee haa suwee 1974, e nokku gollorɗe siyaas awooli maaje mo Nantes to leydi Farayse e hitaande 1975-1976.
Nde o arti leydi Muritani gollal makko gadanal ko wonde biɗtoowo to nokku ƴeewngo awo (laboratoire) Muritani e hitaande 1975 ; o wonii kadi mawɗo laboratuwaar awo Nuwaadibu e kalfinaaɗo tummbudu fiilto e wiɗto diƴƴe (oceanographie et biologie marine) tuggi 1976 haa 1978. O heɓiї fartaŋŋe ardineede santar ngenndiijo wiɗto fiilto e awo (CNROP) mo Nuwaadibu tuggi 1978 haa 1980. Sabu makko humpitaade e jogaade ganndal timmungal peewtungal e karallaagal awo, diƴƴe kam e jawdi addanii mo toɗɗeede diisneteeɗo karallo to Ministeer awo kam e ngalu maayo е hitaande 1980-1981. E hitaande 2003, Bah Mbaare toɗɗaama jaagorɗo awo kam e ngalu maayo. Bah Mbaare ko neɗɗo luulndo wonnoo е seeɗa e nder yonta Maawuya ; o wonii Meer Waali Jantaŋ tuggi 1986 haa nde o hooti e joomiiko. Caggal nde Muritani woni e iiñturu mawndu tawi sabaabu mum ko kudetaa senerooji larme e gardagol Abdel Asiis, feewde e persidaa Seek wul Siidi Abdallaahi ngam leydi ndii arta e laawol goonga pawingol e doosgal Muritani, addanii Bah Mbaare lomtaade e japeere leydi ndii tuggi 15 Abriil 2009 haa 05 Ut 2009, caggal wooteeji gartirɗi Adel Asiis e laamu. Ko 26 Abriil 2007 o toɗɗaa mawɗo senaa Muritani caggal nde o toɗɗaa senatoor Magaama. Sabu golle makko maantinde e nder diiwaan maɓɓe, addanii ɓesngu diiwaan oo suɓaade mo e nanondirde wonde hay gooto wonataa Meer so omo wuuri, е goo kaaɗdi nguurndam makko.
Jikkuuji Makko
Hawraama wonde MBaare ko gorko moƴƴo, gannduɗo fotde, etee baɗoowo ɗum, nuunɗuɗo. Omo yiɗi hoore makko, neɗɗo fof omo hormii ɗum. Ko o joom konngol. To baɗte ngenndiyankaagal, Mbaare heedaani caggal, kala ko o jokkondiraa omo waɗa fotde kala ko o hollitaa omo daranoo ɗum laŋ. Ngam duusde mo, leydi Muritani waɗii sunu balɗe tati, araraay lesɗinaama, Quraana tan janngatee e rajo e tele fof. Fulɓe e safalɓe, jolfuɓe e soninkooɓe fof nootitiima e wirwirnde makko to Waali Jantaŋ.
MBaare Bah yahii, yo Alla yurme yaafo maa juuɗe moƴƴe njaɓɓo maa. Aamiin.
Wirwirnde Bah Mbaare
Aduna alaa ko ari duumaade, alaa ko gasataa, kono ina waɗi ko ɓooyata siimteede, ɓuri moƴƴude noon ko siimtaneede ko moƴƴi caggal ɗuum. Ko ɗuum woni ko Bah Mbaare Sam Bakkaat dañi ɗoo hannde e Waali Jantaŋ.
Ciimtol wirwirnde maako.
Ko ñalnde altine 14 saawiyee 2013 yimɓe ɓee puɗɗii arde e wuro Waali ngoo, ummoraade baŋ-yoo-baŋ, fuɗnaange e hirnange, rewo e worgo. Ɓee ina ngarda otooji, ɓee ina ngarda saretaaji, ɓee ngarda taamakuru. Dingiral heewii haa soki banngeeji kala. Ko maa poliseeji ceeki yimɓe ɓee nde hilifaaɓe laamu e seernaaɓe notitinooɓe e wirwirnde hee ndañi ɗo ndewi. Alla e jamaanu oo heewde, yimɓe mbaɗti ko ŋabbude e tataaji e kuɓeeje e taakawuuji e leɗɗe ngam sooynaade. Nde gooski kii ƴettii, sappeeji juulooɓе limotaako Alla e mum en heewde. Bah Mbaare Sam Bakkaat “ suddiima leppi leydi, leydi suddii mo leppi teddungal » nde tawnoo neɗɗo yettetaake, yennetaake ko golle mum tan kaaletee.
Mammadu Maamuudu Baal e
Salli Sih, sakke mo ñaamataa hakke.
