He lewru kawle ( oktoobar) 2025 haala warngooji laatiiɗi “Ñamaande Aduna” urmbitiima. Urmbiti ka ko kaabaaru biyoowo laamu ine heɓii yaltinde 27 miliyaar ugiyya ndaamordi wonande joljole ƴiiƴiije kewnooɗe hakkunde 1989 e 1992. Ɗum jibini ɗamaawu, kono urmbiti ñiŋooje pelle daraniiɗe jojjanɗe aadee jokkuɗe kañum en ɗaɓɓude dewrugol e ñaawoore.
Ndee “ Ñamaande Aduna” toɗɗii ko jaɓɓugol kuɓtinngol jojjanɗe aadee he ɗiin duuɓi : nangle ɗe ndewaani laawol, warngooji amdu, taccingol faade Senegaal e Mali, keɓtugol jawɗeele e leyɗe ndema, joopiiɗe, ko ɓuri teeŋtude leƴƴi Muritani ɓaleeji ɗii.
Ɗoon e ɗoon pelle baaɗe no “Goomu kaɓɓondiral – CSVVM “ e “Haɓɓere rewɓe ɓe worɓe mum en mbaraa” njalti ngam siftinde ko kewnoo koo, e ɗaɓɓude tawo ñaawoore.
E wiyde won ɓeen haaldunooɓe e laamu nguu (won ɗeen jagge daɗnooɗe e warngooji ɗii), ndii ndaamordi ko njeñtudi kaaldigal ko ine wona lebbi keewɗi, e laamu nguu. Kadi ɓe ɗaɓɓunoo ko 35 miliyaar, kono laamu nguu sakkiti ko 27 miliyaar ɗii. Faandaare maggu heen ko yiɗde uddude haala kaa. Kono keewal loraaɓe ɓee, ko wayi no haɓɓere rewɓe ɓe worɓe mum en mbaraa, e baayeeji, mbiyi ko “Goonga hade kaalis”.
Ko noon kadi, won ngaal dental pelle jojjanɗe aadee yaltini bayyinaango aybinoowo niɓɓere taariinde oo doosiyee, sabu e wiyde maɓɓe, ɓurɓe ɓadaade geɗe ɗee ko joñaaɓe e haala kaa, yeru “Collectif des veuves”.
Noon ne kadi Kajjata Maalik Jallo, carɗoowo, rokkiri heen miijo mum he yeewtere waɗdunoo e Suudu Baaba.
Ñande 13 jolal “Coalition Anti-Système- CAS”, hono hollitiri miijo mum heen, waawngo tonngireede nii : luuldaade “mukñaa” hakkunde laamu e won ɓeen yimɓe; teeŋtinde wonde loraaɓe ɓee “njiylii ko tedungal e goonga, njiyalaaki kaalis” e keɓtingol leydi ndii tooñannge ngee ; ɗaɓɓude ñaawoore tuugiinde he calɗi 4 : Goonga, ñaawoore-nuunɗal; lomtinangol ; maanditaare e yaafuya. Ɗum ko tuugnaade e humpito Afrik worgo, Maruk, e Ruwannda.
Haa e ñalngu hannde nguu noon (24 jolal 2025) haala kaa taƴaani tawo. Laamu ellee ine nangtii tawo e eɓɓaande mum dokkal ndaamordi. Kono pelle idiiɗe daranaade doosiyee oo (CSVVM, Collectif des veuves, e hoohooɓe waaɓe no Kajjata Maalik Jallo, carɗoowo) ine ciftina wonde : so goomu njaambureeu toɗɗaaka, yeewtere nder parlemaa ngam lelnude sariya tuugorɗo yuɓɓinaaka, loraaɓe ɓee njeytoraaka e haala kaa haa timmi e daawe ɗee fof, njogor-ɗen rewde tan ko ɗo rewanoo ɗoo, so joñtitde ñawannde nde safraaka no moƴƴi.
