Goomu Pulaagu habrii wonde yamre Firefox ɓenndude yaltii gila 5 lewru suwee 2012. Firefox noon, ko feerorde (navigateur), woni kuutorgal gaddanoowal en waawde feeraade e internet. Peerorɗe ɓurɗe waawde huutoreede e oo ɗoo sahaa he leydi Muritani he Internet Explorer (Microsoft), Firefox (Mozilla), Chrome (Google), Safari (Apple), Opera (Opera Software) wonande ko mbiyaten ordinateeruuji koo.
Fuli Firefox noon ko Goomu Fulfulde gollodtoongu e fedde (Réseau Africain ɗe Localisation (ANLoc) ” wonde to Afrik Worgo. To bannge karallaagal noon, firo ngoo fof waɗetee ko e lowre http ://pootle.locamotion.org/ff/ ɗo ngolloto-ɗen enen e koye men.
Nokku oo ina waɗi geɗe keewɗe potɗe fireede e fulfulde. Yamre ndaɗɗudi ndee wiyetee ko “ terminologie ” (kelmeendi), woni yamre waɗnde fotde 1 073 helmere, kelme ɓurɗe waawde huutoreede e informatik. En ngollodiima ndeen yamre e Umar Bah Gonngoore (Pullo Ginenaajo gonɗo hannde to Vienne, Otris) e Ibraahiima Malal Saar, mawɗo Goomu Pulaagu, gonɗo to Le Havre, Farayse. Ko e hitaande 2010 wonnoo. Gila ndeen yamre ndee joofi, gooto fof ko duniiɗo bannge mum : Ibraahiima huccani yamre Abiword e Virtaal e Firefox e goɗɗe, enenne kuccan-ɗen ANLOC Formation FR (kelmeendi Heblo ANLoc) e Pootle User Manual (dabi kuutoragol Pootle), caggal nde nduttodi-ɗen e Umar Bah to kelmeendi too. Fof noon ko e yarlitaare, min tinaani so won ko yoɓeteeɓe heen.
Eɗen potnoo tawtoreede heblo jowitiingo e ɗuum e lewru desaambar 2010, kono caɗeele ndiwoowa kadi en yahde. Hannde oo, ko foti fireede ina heewi no feewi saɗne. Ko ɓuri heewde e topirde ina mbelliti neɗɗo kala firde ɗum en e ɗemngal mum. Wonanta heen joom mum tan ko firde, ko heeddii koo kamɓe toppitii. Ina jeyaa noon e geɗe ɓurnoode foodtude hakkillaaji men, firo kelle Google, ganndiraade GIYL (Google In Your Langage : Google e ɗemngal maa) sabu men miijaade wonde Google ɓuri yaajde, ina gasa tawa ko kañum urata yaawde sarde ɗemngal men ngal. Ko ɗuum nii tagi, gila hitaande 2009, cos-ɗen doggol jeewte google e-pulaar, ɗo ngostondirten miijooji ko fayti e firooji. En njahii haa cos-ɗen goomu ɗoo e wuro Nuwaasoot hee, e gardagol Fedde Ɓamtaare Pulaar e Muritani, nguun goomu fuɗɗiima gollaaɗe, kono golle mum ko ko ndartii e oo ɗoo sahaa. Enen noon, eɗen njokki gollaaɗe toon. Ko wonaa ɗum koo, golle goɗɗe kimmuɗe ina mbaawi waɗeede to ff.wikidedia.org, nokku ɗo hay gooto waawaa heɓɓinde, sabu ko nokku ɗo denndaangal gannde tawetee… E oo ɗoo sahaa, ko Umar Bah Gongoore tan, ɓuri heewde yahde toon.
Ɗum noon, ko foti waɗeede ina heewi no feewi : ko foti fireede e internet koo gasataa, sibu, ko woodaa e gannde koo, gasataa, ko yaltata e ɗemɗe goɗɗe ina foti fuleede koо, gasataa haa abada : Ko ɗum tagi eɗen poti ummanaade ɗum tigi rigi. Ndeen. Ɗum ɓurnoo sadde, kono hannde, nde tawnoo ɗemɗe men nattii jogaade caɗeele to bannge binndol e nder masinaaji hee, ɗum ɓeydiima newaade. Hay ɗuum ne, Alla waɗi alaa ko leñol ngol waɗi heen, sibu ko fedde wiyeteende UNICODE, toppitiinde yuɓɓinde maade binndi ñawndani en ɗuum tawi en tinaani boom, tawi eɓe njiyloo ñawndude caɗeele binndol ɗemɗe goɗɗe ɓurɗe hittude, ko wayi no sinuwaa (kuutortoode jeloode -idéogrammes-) e Arab e Farsi (oinndirteede ñaamomo feewde nano) ekn… Alla waɗi kadi ɗum hawri e windows ina feewnunoo gila e hitaande 2004 topirde feewnirde tappirde wiyeteende « Microsoft Keyboard Layout Creator (MSKLC) » taweteende dooyene http ://www.microsoft.com/downl oads/details.aspx?familyid=FB7B3 DCD-D4C1-4943-9C74- D8DF57EF19D7&displaylang=en, Eɗen njaakorii tan, e ko fayi arde, maa firooɓе ɓeе kala “peɗɗit » dunande mum en, (ɗum firti lowe ɗee njantondira, wonande ɓe ngoowaani demal) wonta lowre wootere, ngollodoo, sibu ko ndeen golle ɗee ɓurata moƴƴude. E anndude kadi, so “ unoоɓе сuudondirii naafde, unu mum en diggataa ”. So gooto fof tufii tiinde mum, ina gasa wooda ko gasni, kono gostondiral miijooji Ɓuri waawde moƴƴinde golle.
Tesko : Pootle woni lowre gollorɗe firooji ndee.(PO-based Online Translation/Localization Engine).
Bookara Aamadu Bah
