Yiilirde Ngenndiire Fedde Ɓamtaare Pulaar he Muritani (FƁPM) yilliima cate fedde ndee gonɗo he diiwal Barakna, tuggi 28 mbooy (mars) haa 4 seeɗto (abriil) 2026. Faandaare njillu nguu ko hirjinde ɗe e semmbinde ɗe. Yahannoo toon yiilirde ndee ko Mammadu Haasi Mbay, cukko-hooreejo, kalfinaaɗo heblo e tiiɗtingol kattanɗe, mawɗo lappol ngol, Aamadu Alasan Sal, koolaaɗo kuuɓal, kalfinaaɗo njuɓɓudi e eddaagu, e Abuu Aamadu Kan, kalfinaaɗo kumpital e dallinannde.
Tuugnorgal golle ɗee, ko kala catal ngal ɓe ngari ɓe mbatda e yiilirde mum, caggal ɗuum ɓe njuɓɓina heen batu kuuɓtodinngu. He kala ɗo ɓe njooɗodii e yiilirde catal, ɓe ittondira kumpa ko faati nguurndam fedde ndee e golle daranaaɗe ɗee, ɓe ngartira hakkille mum e doosɗe e sarɗiyeeji fedde ndee. Nder batu kuɓtodinngu, ɓe hirjina terɗe ɗee ko faati dallinannde pelle pinal ɗee hono laawɗingol ɗemɗe ngenndiije Pulaar, Sooninke e Wolof, kam e jaajtingol jaawngol janngirgol majje nder duɗe laamu. Yanti heen ko hirjino faatungo e mahngo Galle pulaar, e habrude mawningol maanditaare duuɓi 50 fedde ndee ñalnde 6 e 7 korse (suweŋ) 2026.
Ñalnde 29/03/26 lappol ngol ñalli ko Sahrendoogu. Jaɓɓii ngol ɗoon ko yiilirde catal ngal e hoohooɓe wuro ngoo. Batu hakkunde nulaaɓe yiilirde ngenndi e yiilirde catal ngal fuɗɗii ko caggal waktu 12. Joɗnde huɓtodinnde ndee fuɗɗoyii ko caggal takkusaan, e tawtoreede yimɓe yonɓe, haa teeŋti e rewɓe e sukaaɓe.
Ñalnde 30/03/26 lappol ngol yilloyii ko catal FƁPM Calgu, ko ɗoon nii ngol juuli takkusaan. Jaɓɓii ngol ɗoon ko banndiraaɓe rewɓe e worɓe halifaaɓe wuro ngoo. Lelaani ngol jooɗodii e yiilirde catal ngal ngam yeewtidde ko adii batu dingiral. Ɓesngu wuro ngoo fodii maa daro laŋ ngam waɗde hirjino yaajngo no galle pulaar laatorii sabu heewɓe e maɓɓe paamaano. Ko caggal geeƴe lappol ngol yalti wuro ngoo.
Ñalnde 31/03/26 lappol ngol ñaltoyi ko Baabaaɓe. Ngol jaɓɓaa ko naatirde wuro ngoo hedde w11. Caggal ɗuum joɗnde fuɗɗodaa e yiilirde catal ngal. Caggal takkusaan yeewtere dingiral fuɗɗaa. Gaa gaa toɓɓe ginol golle ɗee, almudɓe pulaar mbaɗi pulaareeje e jime. Ko ɗoon lappol ngol hirtii hade mum loowtude laawol faade jipporde mum to Haayre Mbaar, hedde w:00 (feccere jamma).
Ñalnde 02/03/26 hirndanaa ko Garlol, wuro Abdullaay Haaruuna Sih mo fedde ɓamtaare pulaar he Muritani yejjittaa ngam darnde maantinnde he nguurndam mum. Ko sahnga waktu 17 yettaa toon. Caggal ɗuum batu ngu fuɗɗii.
Ñalnde 03/04/26 yontaa ko Haayre Mbaara, jippunde sete yiilirde ngenndi. Ko sahnga waktu 11 batu yiilirde hakkunde sete Yiilirde ngenndi e yiilirde catal ngal fuɗɗaa. Batu dingiral fuɗɗaa ko sahnga w18 h30.Ɗoon ne kadi tawaa ko yimɓe ɓe ine padi lappol ngol tawi kaaɓaani, tampaani.
Ñalnde 04/04/26 lappol ngol ummii Haayre Mbaara yaaɓani Gural sara Eeleega. Hooreejo catal ngal jaɓɓii lappol ngol ɗo laabi-celi (karafuur) Eeleega hedde w11. Caggal ɗum yimɓe ɓe njaaɓani Duɗal sukaaɓe janngooɓe, ko toon joɗnde nde waɗaa. Caggal ɗum sete yiilirde ngenndi Ganniiru Resordu nagge fulfule, ɗo pinal e aadaaji men mooftaa. Ko w15h45 sete yiilirde ngenndi ummii Gural fayde to Nuwaasot laamorgo.
Abuu Kan, kalfinaaɗo kumptal FƁPM
