Nde Ben Aali dogi ndee, Kaddaafi wiyiino “ Tuunus waawaa dañde ko ɓuri Ben Aali ”, o ɓeydi heen “ ko Ben Aali woni haa hannde hooreejo dagiiɗo leydi Tuunus ». E nder yeewtere nde o waɗdi e tele biyeteeɗo Nesma, Kaddaafi haalii goɗɗum e ɗee ɗoo balɗe, so wiyde “ hay gooto waawaa luulndaaɗe yiɗde ɓesngu Tuunus. …So tawii ɓesngu Tuunus umminii waklitere, ko kanngu foti suɓanaade hoore maggu fotɓe ardaade leydi ndii. Mbaawat-mi tan ko wallitde ndeen yiɗde ɓesngu ”. Nde o haalata ɗum nde omo ɓoornii kostim daneejo e lone ɓaleeje… O jokki heen “ Mi wondaani e Trabelsien… Ko kewi Tuunus ko ina himmani Libi no feewi. Kono miɗo huli hoto woɗɓe selnude waklitere Tunus ndee faayndaare mum, sibu won wonɓe caggal leydi mbaɗata jiilyiilte ngam hisnnde nafooje mumen« . O wiyi kadi “ waklitereyankooɓe Tuunus ina poti heɗaade mi, sibu ko mi wakliteranke ”. O hollitii wonde Tuunus ina jogii geɗe ɗe foti hisnude ko wayi no hurum debbo rokkaa toon o, yeru karmingol nawliigu walla dewgal tuugingal e jaɓgol resondirooɓe ɓe.
“ Rewɓe Tunus ndimeɗii, tee mi sikkaani so ɓe njaɓa wonde e les njimaandi lislaamiyankooɓe Ennahdaa, sibu ɗuum ko yahrude caggal ”. Heewɓe ina kaawaa ɗii ɗoo haalaluuji luurondirɗi e nder balɗe seeɗa. Kono, ɗum haawnaaki e Kaddaafi.
