Ñalnde alet 04/04/2010 to Juude Jeeri, e gardagol baabakar Njaac, taanum ceerno tedduɗo, iwɗo Ndakaaru ina ardi e seteeji almudɓe e taaniraaɓe e enɗam Ceemo Sammba Jaadanaa. Siyaara oo udditaa ko ñalnde alet waktuuji 10 subaka pawɗo hojomaaji 20. Siyaara oo udditi ko e tawtoreede nelaaɓe laamu Muritani jooɗiiɓe to tundu Baabaaɓe, e nelaaɓe Ceermo Madaani Taal to Ndakaaru, e Nelaaɓe gure, e Juude-Jaaɓi, Juude Daande maayo, Haayre Golleere, Haayre Mbaara, Kasga, Seeno Busooɓe, Baabaaɓe, Cilaa, Mbotto…, nelaaɓe rajo e tele laamu Muritani, nelaaɓe Fedde Ɓamtaare Pulaar e Muritani.
Siyaara oo, caggal konngol bismaango feewde e yimɓe ɓe, udditiraa ko silko Ɓuraana, fotde e nder heen “ Daahiira Sammba Jaadanaa Njaac ” rokkaa konngol e demngel porfesoor Abuu Joop, tergal Daahira oo, keblunoozo deftere joofnirgol laabi 6, yantude e duwawuuji baɗaazi feewde e kanko cahoɗinɗo oo, e feewde e denndaangal juulɓe. Oo kewu gasi ko saanga tisubaar. Yimɓe carondiri kawritoyi jamma caggal kiraaɗe e Mawluud, mawluud jaajniiɗo e teddinde nelaaɗo ALLA SallAllaahu Aleyhi wa Sallam, e siimtude nguurndam Alliyankaagal Ceemo Sammba Jaadanaa (jaŋde makko Ɓuraana, to o janngini, no o wardaa e sabaabu Tijjaani, ɗo o waraa, no o wardaa e sabaabu warngo makko kanko e wondiiɓe makko.
Mawluud ƴeesiraa ko duwaawuuji feewde e makko, kanko cahoɗinɗo oo e wondiiɓe makko e denndaangal juulɓe. Nalnde altine 05/04/2010 siyaara oo ummii Juude Jeeri feewi to yanaande Ceemo tedduɗo oo, to gawdal koolɗi, hakkunde Juude Jeeri e Haayre Golleere, ngam juuroyaade mo kanko сееrno оo. Ɗoo, gure catiiɗe ɗee fof ngarii e keewal gila e sukaaɓe haa e rewɓe haa e mawɓe alaa keddiiɗo. Ɗo kadi deftere Ɓuraana ndee silkaama laabi 2. Caggal ɗuum duwawuuji mbaɗaa ; konngol rokkaa won e seteeji gardi ɗi. Ko e nder heen “ Daahiira Sammba Jaadanaa Njaac ” rokkaa konngol e ɗemngel porfesoor Abuu Joop, tergal Daahira oo, keblunooɗo deftere joofnirgol jaŋde feewtunde e nguurndam Sammba Jaadanaa, jaŋde makko Ɓuraama fuɗɗiinde Juude Jaaɓi, reɓi haa duɗal Piir Sañakuur, ɓe o janngidi, ɗo o jaggi wirdu Tijjaani, caɗeele makko e Almaami e tuubakiri, enɗam makko, Sabaabu luural makko e tuubakari e taƴgol daande makko, e warngooji dewɗi heen, maalɗeeji baɗaaɗi haa rewo, ɗo o mooloyinoo haa o jaggaa, caggal ɗum dañii ɓeyduɓe e yeewtere ndee. Ɗoon hankadi yimɓe mbaynondiri caggal nde cakkiti duwaawuuji moƴƴere feewde e nokku оо е ɓesngu nguu e juulɓe kala.
Sete FBPM waawii e nder heen, yillaaɗe duɗal Ceemo Sammba Jaadanaa ɗo wonnoo ɗo, hono Gawdal koolɗi. Juuraade baamuule ɗo yoga e wonndiiɓe Ceemo ɓe lelii, hollede ngooroondi tata Ceemo Sammba Jaadanaa ɗo sara ɗo o lelii ɗo, jokkondirde e hoohooɓe tedduɓe arɓe siyaara, haa teeŋti e taanum Ceemo Sammba Jaadannaa biyeteeɗo Baabakar Njaac, kebludo siyaara oo, iwɗo Ndakaaru (Senegaal) ko kam yettinaa ballal FBPM feewde e siyaara oo.
Abdullaay Haaruuna Sih
