Gannda Fadiga, gawlo malinaajo, koɗoowo ŋanaa, nattii ñalnde 19 settaambar 2009 to Pari (Farayse). E hirnaange Afrik he, ina famɗi mo meeɗaa heɗaade hoɗdu makko, sabu kanko fof e wonde sooninke, o hoɗanta ko yimɓe fof, walla mbiyen leƴƴi fof.
Gannda Fadiga jibinaa ko e hitaande 1949, to wuro Marena Jommbo ko (Kaay). O janngii hoɗdu law. Nde o dañi duubiі 14, o yahi janngoyde hoɗdu (gammbere e sooninke) he biyeteeɗo Jaaƴe Sira, jannginnooɗo baaba makko, hono Demmba Fadiga hoɗdu. O wiyatnoo hoore makko ko “gawlo gammbeeru hakkunde leyɗeele”, ɗum hollitta ko mbaawka makko, e darnde makko e cargol e nder winndere nde pinal e gaaci Afrik haa teeŋti e ɗi sooninke ɗi.
O yilliima aduna oo fof, o jokkii enɗam, o renndinii sooninkooɓe jasporaa, hono uujɓe ɓe. E nder gaaci makko (poyi, seygelaare, moolaare, njaru, kaaro…) Gannda Fadiga heewi haalde ko jaabaraagal, cuusal, nuunɗal ; e daari jaambareeɓe. O meeɗaa yejjitde yimɓe moƴƴunooɓe e makko : e ɓeen eɗen mbaawi limtude Baydi Alasan Bah mo o wiyatnoo Bah Baydi Laasana e nder lefol ngol o fiilannoo ɗum to Nuwaadibu, sabu kaaraysiraagal Baydi feewde e makko (ko e ngool lefol enen e koye men hakkille men hucciti tigi rigi e gaaci Gannda Faadiga).
Yo Alla yurmo, yaafoo Al Hajji Gannda Fadiga, yo Alla haarnu mo Aljanna, kanko e maayɓe juulɓe fof. Aamiin.
Ƴoogirde : Cridem, 21.09.09,
e kuɗol Kaliilu Jagana, in SILLY SALL from TOULEL, SONINKARA.COM
Fulo Aamadu Umar Jah
