Kawgel fuku ngenndiije Afrik 2025, juɓɓinaangel to Maruk, joofrii jaggondiral ŋeerngal, keewngal ɓilaa-mbeñaa hakkunde Barooɗe ɗiɗi, Barooɗe Atlaas e Barooɗe Terannga, joofrungal poolgu Barooɗe Senegaal. Eɗen mbaawi wiyde tan, ɗee barooɗe mbaɗii tigi ko yaakoraa he sippiro barooɗe. Jaggondiral joofirgal ngal waɗi ko ñalnde 18 siilo 2026, to boowal Rabaa. He nder waktu dottaaɗo hee, diɗɗe ɗiɗi ɗee ndonkondir. Maruk etiima ƴooñde Senegaal ɓaariiɗo ɗo tiiɗi, jaabtoriiɗo jurƴe jaawɗe. Ɗuum ko hade Maruk heɓde penalti dow ɗaɓɓaande VAR.
Ɗuum jibini laawaare senegaalnaaɓe, haa njalti dingiral. Alla waɗi kisa penalti oo alaa jibini, sibu Eduwaar Menndi, deenoowo gaalɗi oo jaggii fuku oo. Ɗuum kadi ɓeydi softeende senegaalnaaɓe haa waktu laawɗuɗo oo joofi, alaa ballinɗo. He jokkere pelɓondiral hee, Senegaal ardi e hoolaare mawnde. Nii woni he hojam 94ɓo, Pap Gey wallini. Haa joofi ko ndee waalnde wootere jaggondiral ngal joofiri. Nii woni Senegaal nawii raay mum ɗimmo he ngel kawgol fuku. Ngal joofirgal wulii no feewii. Senegaalnaaɓe mbaawii deeƴnude hakkillaaji mum nder ngal jaggondiral keewngal ɓilaa-mbeñaa, yeewo jamaanu guraaniiɗo joom nokku en, e hisde e bemjine keewɗe (cuuɗe sarbetaaji, ceerndoowo tuumaaɗo jinngere…).
So goonga ko waawnoo wonde fof, Senegaal teeŋtinii ko Diɗɗal fuku moolanaangal jogii hannde. Kawgel ngel kadi hollii tolno toowɗo diɗɗe fuku Afrik. Eɗen cabbii he ko ɓuri ɗum yooɗde he kawgel fuku winndere paangel, he lewru korse 2026 to Dowlaaji dentuɗi, Kanadaa… Yo Alla rokku en taweede.
