Ñande 07 lewru jolal 2024, Haakem gardiiɗo falnde Kayhayɗi hurmbitii Nokku heblo Mecce e Jaŋde Sukaaɓe Rewɓe (Centre d’alphabétisation et d’insertion socio-économique des jeunes filles), ina ardi e sete maantiniiɗo, ina jeyaa heen cukko gadano meer mo komiin Kayhayɗi, cukko hooreejo conseil Régional mo diiwaan Gorgol, koolaaɗo kuuɓal toppitiiɗo geɗe renndo DRASEF, gonnooɗo Meer komiin Neere Waalo, hono Abdul Elimaan Accee, e tawtoreede mawɗo wuro Beelinaaɓe, hono Aan Raasin Mammadu, Njaay Saydu Aamadu Gelongal Fuuta tawtoraama.
Ko fedde ADEREM (Duɗal Baaba leñol) mahanaa galle oo e dow innde wuro ngoo e diiwaan oo fof. Waɗi ɗee golle jooɗɗe ko fedde nde wonaa laamuyankoore ina wiyee ASP jooɗiinde to leydi Farayse. Ardii fedde ndee ko Aamadu Tijjaani Njaay. Ina jooɗanii ɗo fedde nde e Muritani haa teeŋti e diiwaan Gorgol Ceerno Njaay. Gure men hirnaange Booseya tawtoraama, haa wuro men Seyyeen Gababe e nder komiin Ganki.
Golle ɗee udditiraa ko Ɓuraana tedduɗo e daande ceerno Aali Bah. Ardii fedde ADEREM (Association pour le Développement des jeunes Ruraux de Mauritanie) ko Fedde Ɓamtaare Rewɓe Dowri Muritani. Ardii fedde ndee ko Mayram Mammadu Aan lollirɗo Mayram Daddaa. O waɗii haalannde ngam jaarde fedde ASP e hoohooɓe laamu e denndaangal tawtoraaɓe. Ciftinen renndo ngoo, ndiiɗoo mahdi kesiri udditaa ina waɗi keblorɗe, suudu gollordu walla heblo, suudu yeeyirdu, suudu masiŋ gunoowo. Fedde ADEREM ina golloo golle keewɗe : peewnugol lacciri, caakri, karaw, baylugol e mooftugol legimaaji, eɓe njanngina Pulaar, Arab e Farayse.
Ndiiɗoo mahdi kesiri hannde mahaandi, maa wonan renndo ngoo fartaŋŋe waawde hebleede e geɗe keewɗe naftooje ɓesnguuji men. Kuɗol Abdul KadeerAan
