Ñalnde 31 bowte (desaambar) 2022, biyeteeɗo Haamiidu Elimaan Muusaa Saydu Bah, fiilaama Elimaan Baabaaɓe Looti.
Tammbii piilngal ngal, e fuuɗoode, ko galleeji nay. E ko sakkitii koo, galle gooto ɓeydiima heen woni galleeji joy : galle elimaan Sammba Aali, galle Elimaan Maalik, galle Buubuu, galle foogaa e galle jam e potal.
Ko jettooje (jettooɗe) tati njeytoree he piilngal ngal : Bahbahɓe e Somsomɓe (Sohsohɓe) e Jaambureeɓe. Yetteteeɓe Bah ɓee ngoni fiileteeɓe. Jaambureeɓe njogii piilngal ngal, ɓe totta lefol ngol somsomɓe yo piil piileteeɗo oo.
Bahbahɓe ɓee ine e galleeji tati : galle heen kala ine waɗi bahbahɓe fotɓe laamaade. Adan, so lefol ngol diwɗii, Bahabaho kala ine waawi ƴamde ngol. Ɓe ƴamata noon ko jaambureeɓe ɓee. Galle fof ine waɗi jaambureeɓe mum, tee ardotoo ɗum en ko ɓurɗo duuɓi oo. Bahbahɓe ɓee njettoo galleeji maɓɓe ɗii fof, ɗaɓɓira ɗum en piilngal. So ɓeen njaɓanii heen galle, oon suɓoo he nder mum potɗo fiileede oo. So piilngal heedii, Elimaan arii jooɗiima, jaambuur ara daroo, somsomɓe ɗiɗo ngara, tawtoya Elimaan oo to foti fiileede too, piila ɗum. Ngolɗoo laawol noon, somsomɓe ɓee ngonii tato, kono addi ɗum ko won cohsoho arnoo hollude ɓeya no piilngal yahrata, sibu kañum waɗatnoo ɗum. Kono fotnoo wonde ko piileteeɗo oo, e somsomɓe ɗiɗo e Jaambuur gooto.
Jaambuur oo seedtoo wonde bahbahɓe ɓee ndewii ɗo potnoo rewde ɗoo fof, njaɓanaama fiileede. O itta lefol kesol pul, o totta somsomɓe ɓee yo piil mo. Ɓeen piila mo. Caggal ɗuum yimɓe paata e pijirlooji e njimri e ngamri. Ooɗoo sifaa noon nattii reweede gila hitaande 26 bowte 1971. Gila ndeen wonaa jiɗɗo fof ƴama, wontii lomlomtondiral : So ooɗoo galle ƴettii, wona heen duuɓi nay, faata e galle goɗɗo, ɓeen ngona heen duuɓi nay, noon noon haa galleeji tati ɗii kawra, fuɗɗitoo kadi, pooɗondiral nattii, ko galle jontaaɗo fof fiiletee.
Bookara Aamadu Bah
