Ko ñalnde 29 abriil Malinaaɓe cuɓotoo mawɗo leydi mum en. Kono hikka, ina gasa tawa kanndidaaji keewataa toon nde tawnoo sarɗiiji pawaaɗi heen ɗi ina ɗeɓi ŋeerde seeɗa : So aɗa yiɗi wonde kanndidaa, alaa e sago, ko famɗi fof, depiteeji sappo ciifan maa, walla ndeen e nder diiwanuuji ɗii kala tawa konseyeeji joy ina ciifan maa. Tawi kadi hay gooto waawaa siifande ko ɓuri kanndidaa gooto. ƴanti heen, balɗe ɗiɗi so pawiima e nde njoɗɗin-ɗaa kaayitaaji ma kanndidatiir, alaa e sago mbersaa njuknaari miliyoŋaaji sappo CFA, tawi ko feccere heen tan rutteede, hay ɗum ne ko maa keɓaa ko famɗi fof 5% e daaɗe wootɓe ɓe. Sikke alaa ɗiiɗoo sarɗiiji ma kaɗ keewgol kannditiraaji.
E hitaande 2002 ko yimɓe 20 ngonnoo toon kanndidaaji. Kono hikka, haa e ooɗoo sahaa, ko hoohooɓe politik nayo tan puɗɗii fiileede e nder partiiji mum en, hay so tawii ina ɗaminaa tato walla nayo woɗɓe maa tawtu ɓe, heddoo noon dañde siñaatiiruuji e kaalis biyaaɗo o. Ko ɓeeɗoo njeetato njogori fooɗondirde laamu :
– Ibraahiim Buubakar Keytaa (IBK) : O alaa caɗeele siñaatiiruuji sabu parti makko, hono Dental wonande Mali (Rassemblement pour le Mali), ina jogii ko ina ɓura 40 depitee e ko ina ɓura ujunere konseyee. E 2002 ko kanko arnoo tataɓo.
– Cebile Daraame : O alaa caɗeele huuɓnude sarɗiiji ɗiɗi kaalaaɗi ɗi, sibu parti makko, hono PARENA ina waawi dañande mo konseyeeji coklaaɗi ɗi e diiwanuuji ɗi kala. Ko neɗɗo ɓooyɗo haɓanaade demokaraasi.
– Umar Mariko : O jeyaa ko e ardiiɓe dillere sanɗaaji yandinnooɓe Muusaa Taraore. Parti makko, hono « Sadi » siiraani so ina waawi huuɓnude sarɗiiji ɗi.
– Doktoor Majasa Magiraga : kanko woni hooreejo parti biyeteeɗo PPP. O jogaaki hay depitee gooto walla konseyee gooto.
– Sokna Sidibe Aminata Jallo : Oo debbo ko porfeseer Iniwersitee. So o dañii renndinde siñaatiiruuji e kaalis katojinaaɗo o, kanndidatiir makoo maa waɗ dille no feewi.
– Aamadu Tumaani Tuure : hay gooto sikkitaaki ko o jogorɗo wonde kanndidaa hikka kadi, nde tawnoo omo heewi ɗanle nder leydi to, tee ko ina abboo e 30 parti ndentii ngam sosde maalde anndiraande ADP (Alliance pour la Démocratie et le Progrès) tawi ko e dow baggingol makko.
– Sumeylu Bubey Mayga : O jogori tuugaade ko e FDR (Front pour la Démocratie et la RépubliRue) ngam jokkude golle Adema-Pasj. – Mammadu Belees Sanngare : O alaa caɗeele kanko ne ngam huuɓnude sarɗiiji ɗi, sibu parti makko, hono CDSMogotiguiya (Conɓention Social Démocrate) ina jogii konseyeeji e depiteeji jonɗi.
