Ko sariya t° 348 mo 10/12/1979 sosi Duɗal Ɗemɗe Ngenndiije. Ngal halfinaa heblude naatgol majje e tippudi jaaynde leydi ndi. Tuggude 1980 haa 1999 duɗal ngal waawii sosde e udditde: 66 duɗal; heen 52 duɗal ko pulaar e sooninke e wolof ngoni ɗemɗe gadane, Arabe woni ɗemngal ɗiɗaɓal, Farayse tataɓal: 14 duɗal ko Arabe woni ɗemngal gadanal. Pulaar, Sooninke e ɓolof ngoni ɗemɗe ɗiɗaɓe.
Duɗal ƴeewndi jaynde nde e duɗe biyiyaaɗe ɗe. Yimɓe ngiwi caggal leydi e nder leydi ndi, ɓeti jaaynde nde. Gila e jannginooɓe haa e huufɓe e jinnaaɓe sukaaɓe, kañum en kala ceedtiima moƴƴugol ƴeewndo ngo. Hannde o, eɗen mbaawi naamnaade ɓeen ɗoon e kañum e almuɓɓe jannginooɓe e duɗe ɗee, ko feewti e nafoore heɓaande heen. Almuɓɓe: 2165, mbaawii yettaade hitaande 6²; mbaɗi kawgel, heen 711 almuudo ɓenni fayde jaynde hakkundeere nde, ɗuum jiida e ɓennirɓe duɗe laamu e duɗe joɓeteeɗe ɗe. Teskaama wonnde 70 e nder teemedere payraa ko e cate: D C, ko toon keɓi Bak. Won e maɓɓe gaynuɓe jaŋde, won woɗɗoyɓe, ina e maɓɓe waɗtuɓe liggaade.
Teskaama kadi joggade ɓe tolnotoowngo. Ɗuum walliɓe e jokkude jaŋde maɓɓe e duɗe toowɗe ina famɗi e maɓɓe yanooɓe. Ko jannginɓe e duɗe ƴeewndorɗe ɗe e jinnaaɓe almuɓɓe ɓe e seernaaɓe duɗe hakkundeeje ɗe, kaalani mi wonde ina teskii moƴƴugol tolno almuɓɓe iwooɓe e duɗe ɗemɗe ɗe. Kamɓe fof eɓe kawri wonde nafoore maawnde heɓaa heen e faayiida janngude ɗemngal neeniwal feeñii heen Alaa luural! ko fayti e kuccam ɗemɗe ɗe, ɗuum ko huunde toɗɗiinde yimɓe fof.
Laamu ina sokli walleede e ɗum, woni wallude leydi e kala ko nganndu-ɗaa ina waawi addude ballal e ƴellitgol mayri. Miin miɗa yenanaa, tee mi feccaani sekki, wonnde jannginde ɗemɗe ɗe ko huunde nde leydi ndi hatojini no feewi wonande mawɓe e sukaaɓe kala duɗal Ɗemɗe ngenndiije waawi waɗde golle keewɗe na foore sanne ko fayi e ƴellitgol ɗemɗe ɗe. Hannde o, yimɓe heewɓe e nder Muritani e caggal mum ina naftoroo golle maggal. Ko ɗum waɗi ɓamtude duɗal ngal e miijo am, ko huunde jojjunde waɗeede. Sabu ko e geɗe baawɗe wallude e ƴellitde Muritani to bannge pinal e faggude e renndo e dawrugol.
Ñande 21/09/2007 Umaar Mammadu Lollirɗo Suleeymaan Kan Gardinooɗo Duɗal Ɗemɗe Ngenndiije
