Batu 11ɓu Fedde Mooɓondiral Lislaam to Ndakaaru uddi ko ñalnde 15 mars. Batu ngu yaltinii hawraande inniraande Hawraande Ndakaaru. E nder heen ardiiɓe leyɗe juulɓe ina kolliti heen yiɗde “jam arta to Fuɗnaange kam e jojjugol ciynugol denndaangal jamirooje Goomu Kisal Fedde Ngenndiije jowitiiɗe e Al Kods Al Shrif”. Geɗe ɗe nganndu-ɗaa kam en caabii cosgol OCI. Ɓe teeŋtinii kadi kakke mo ɓesngu Palestiin jogii e sosde Dowla dimo tawa ko e keeri tabitɗi. Ɓe ñiŋii ko Israaiil salii ɗooftaade ɗeen jamirooje kam e goodaangal Dowla Palestiin tawi woni laamorgo mum ko Al Kods, salii kadi yaltude tulde Golan leydi Siiri, salii waasde naatde e leydi e kisal Libaan. Ɓe kuniima waɗde feere fof mbele « mbaydi Lislaam, diine jam e kisal goonganteeri ndi”, Lislaam luulndiiɗo kala ko abbitii e paltoor e seɓɓitaare, ina feeña no moƴƴi e nder winndere nde kala. Ɓe ñiŋi no doole maɓɓe potirnoo kala seɓɓitaare e uddaare e mbaydiiji mum kala.
Bayyinaango ngo ñiŋii kadi añɓe Lislaam, holliti wonde alaa diine walla leñol walla leydi maa nguru ɓalndu heeroorii ownugol (terrorisme). Kaɓagol ownugol maa feeñir e daranagol jojjanɗe aadee kam e kaɓgol e baasal. Ɓe teeŋtinii kadi kaɓWondiral hakkunde leyɗe juulɓe. Ngaal ɗoon kaɓWondiral hakkunde leyɗe juulɓe, haa arti noon e Afriknaaɓe maa wallit ɗum en ustude caɗeele mum en. Ko ɗum addani ɓe wagginde “ustugol ñamaale Afrik, duunde ɓurnde fof tinde baasal e ñabbuuli e heege”. Ɗum maa addan ɓe heñaade sosde Booñ Ballondiral (Fonds de Solidarité) mo ɓe pellitnoo sosde gila e batu keñoraangu njooɗinoongu to makka, fotde miliyaaruuji 10 dolaar (2 500 miliyaar ugiyya). Batu ngu wagginii kadi gootinɗingol limlebbi (calendrier) juulɓe, sabu maɓɓe teskaade luure keewɗe wonande ñalɗi juulɗeeli, yeru e nder Senegaal. Ina wayi no gardinooɗo fedde nde, hono Ekmeleddin Ihsanoglu, toɗɗitaama yo ardo nde ɗoo e duuɓi joy payɗi kadi.
