Ñalnde 2 sulyee mawɗo leydi ndi huccitinii konngol e ɓesngu Muritani. Ko arata ko, ko taƴe min cuɓanii on e ngool konngol:
“Miɗo huccita e mon hannde ngam hollitde on kaɓɓagol e piɓle demokaraasi gaddanɗe on rokkude mi hoolaare mon e tuma nde kunotoo-mi gollanaade leydi ndi e nder nuunɗal e kellifuya e yarlitaare. Mi yiɗi hollitde caggal ɗum pellital am jokkude golle, tawi miɗo tuugii e mbaawka ka doosɗe leydi ndi ndokki mi, ngam tiiɗtinde ndeen fiɓnde e danndude leydi ndi e kala kasaara, tawi miɗo fotndi heen fof. Miɗo huccitina e mon konngol e dow goongɗinde hakke mo depiteeji njogii, walla mbiyen ko huunde waɗɗiinde ɓe, ngam tabitinde ndeenka maɓɓe e golle guwarnama, naamnaade ɗum won ɗeen laɓɓitinooje walla gaa ittude hoolaare maɓɓe e mum. Kono tan, no mon nii, miɗo sikkitii hujjaaji kollitaaɗi ɗi, e ooɗoo sahaa mo mbiyi aɓe itta hoolaare maɓɓe e guwarnama toɗɗaaɗo jooni jooni. Musiɗɓe rewɓe e worɓe, Golle ummaanaaɗe ngam liɓde guwarnama o ina kaawi mi e dow sifaaji ɗiɗi :
– Geɗel gadanal ngal, ko kamɓe fuɗɗuɓe ɗum ɓee fof ɓe njeyaa ko e parti gardiiɗo leydi ndi hannde, sabu mum ɓurde heewde depiteeji e senaateeruuji e nder parlemaa he. Ina haawnii no feewi ko ɗiin depiteeji njeddittoo guwarnama mo potnoo wallitde.
Hujja ɗiɗmo o ko guwarnama o dañaani tawo hay hollitde tuugnorgal mum golle haa jaɓee walla salee. Fawtii heen, oo guwarnama ɓooyaani ko toɗɗaa, suwaa tawo nii fuɗɗaade golle haa waawaa ñaaweede.
Ɗum noon hol payndaale saliiɓe oo guwarnama mo suwaa dañde hay lewru e feccere ? Hol ko sabii ndee heñaare ɓurtunde yiɗde yooɓtoraade mo juume ɗe o dañaani hay jot waɗde ? …
Mi yiɗaa ɓe ngaddana mi sikkitaade wonde hoolaare maɓɓe e am iwii ɗo wonnoo haa ko ɗum ina addana mi kuule doosɗeyankooje, ndokkuɗe mi mbaawka fusde asammbele ngenndi o. Mi yiɗaa yettaade ɗoon sibu ɗum ina ɗaɓɓi jot e ngalu e golle ɗe nganndu-ɗaa ina mbaawi huutoreede ngam ƴeellitaare leydi ndi e kisal to bannge nguura e jaŋde e nehdi e cellal e denngaangal geɗe ɓeydooje moƴƴinde nguurndam ɓesngu men. Kono so tawii feere alaa, mi jajjatataa huutoraade ndeen feere ngam artirde hoolaare e dowla o e tiiɗtinde demokaraasi, ngam heɓde kadi wellitaare mawnde woodne huutoreede ngam haɗde guwarnama o gollaade e bonnude innde njuɓɓudi carɗinoori ndi. Kala noon feere nde njorgor-mi ƴettoyde ma mi huutoro kaaldigal, feere ɗo paw-mi golle am kala …
