Koolol ngol waɗi ko to leydi Belsik, ñalnde 15 e 16 lewru settammbar 2008. ɓaɗani en ciimtol ngol ko musiɗɗo Saajo Bah, e nder fulfulde (e ngaddiin caltuka (dialect)) fuuta jaloo. Kanko Saajo bah o wiyi : “Miɗo joortii nde musidɓe meeɗen tarooɓe jaaynde Fooyre Ɓamtaare heɓata yi’annde hesere ko yowitii e caltuɗe ɗemngal fulfulde, so Geno men muuyii.”. Eɗen njaakorii tan ma ɗum addan janngiyankooɓe men woowde pulfulegoɗɗe ɗe. ɗum ne jeyaa haa hannde ko e ɓamtugol Pulaar, so addude paamondiral hakkunde calti ɗemngal ngal, sibu haalooɓe ɗum ɓee fof ko Fulɓe tan mbiyetee.
A jaaraama yo ceerno Bookara. Jooni mi nulde kala ko weeɓiri lam e oo ɗoo dumunna. ɓinndannde ndee ko e ngaddiin caltuka (dialect) fuuta jaloo mi winndi. Miɗo joortii nde musidɓe meeɗen tarooɓe jaaynde Fooyre Ɓamtaare heɓata yi’annde hesere ko yowitii e caltuɗe ɗemngal fulfulde, so Geno men muuyii. Ko yowitii e nate ɗee, maa mi etoo nuldude ma heen ittiri ko mi waawi fow. Ko goonga maa, duwaawu hawrii e aamiin. Jotondiral men woni ko addanta en ɓamtal yaawngal, kadi ko ɗum hollataɗemngal men ngal ko gootum, alaa ko haali leñol men fulɓe. Miɗo heewi winndude e lowre men www.pulaagu.com, mi anndaa so a taskike winndooɓe heen ɓee e nder ko tarataa he lowre ndee koo. Jooni men mahanii en kadi lowre nde hino adda ɓeydaari hesri e golle men jokkanooɗe gila ko neeɓi. Ko jaaynde men siñcanoonde e nder leydi Misra gila e hitaande 1979, e dow ballal ko wayno ƴero Dooro Jalloyo Geno haarnu mo njarnere (aljanna) – e hatanteeɓe men goo, fulfulde fuɗɗii winndeede e nder leyɗe aarabeeɓe. ɗum noon hinde yalta haa e hanndeere ndee, tawde janngooɓe men yahooɓe ton jannde hino jokkondiri e arugol, taYondiraali. Kadi kala yirde janngooɓe arnde, a tawat heen tiiɗniiɓe e ɓamtugol ɗemngal men. Ko sabu ɗum fof waɗi, men ƴetti miijo yowugol ndee jaaynde e jeese (internet), ngam ko nde haanunde toppiteede no jaaynde mawnde fof haaniri toppitireede non…
Kono haa jooni lowre Peeral ndee ko e maheede woni, hay so tawii ko ɓuri hittude koo ñiɓaama, dingiral ngal kadi fuɗɗike gollugol e mbaadi jarundi siftoreede. Saggitorde loowaama heen… Haala gasataa yo koto, jokken golle.
& Hooreejo TPO Tijjaani Mbaalo
Koolol e nder balɗe ɗiɗi, ɗum hawri ñalnde 15 e 16 lewru juko (uksatu) 2008, fottaa to laamɗorde Briksel. Miɗen etoo ɗoo jubbande on seeɗa e ko feƴƴunoo, sabuna ɗum fop heƴataa e binndi. Tinndooje ndaha bus ɓeeɓay, yoora ken, kuɗi bus kadi nduttiɗa, tawa winndooɓe ɗuuɗuɓe yonuɓe cappanɗe, haa jooni yottaaki e sappaɓal (10 %) golle siinaaɗe ɗen, e nder ɗen balɗe.
Tabital Pulaaku Winndere. Ko Alhajji Alfa Aamadu Jallo, Hooreejo Tabital ɓinndere, rokkaa yeewtere udditirnde koolol ngol, o holli e nder yeewtere makko no Tabital Pulaaku siñciraa (sosiraa) haa hewti e ndee hitaade hikka, kanko Jallo o holli yo en wonu neene gooto baaba gooto, wota en gollir fii ɗaɓɓere innde walla ɗaɓɓere laamu, golliren laaɓal e peewal, sabu ko laaWondiral ngal naɓirta en yeeso, ko ɗum nafata en hannde e janngo, o inni (wi’i) kadi golliren fii townugol leñol ngol, gooto fow yo gollan hoore mum.
Batu (conference) nguu : On tuma yeewtooɓe (konferansiyeeɓe) ɓen e wallitotooɓe mum’en ari jooɗii, jokkitii e golle ñallal ngal. Dr. Daawuuda Jah (Muritani), rokkiri ɓe yeewtere gooto gooto, nde wonnoo ko kanko wonnoo mawɗo batu nguu. Penɗe (delegasiyonji) tedduɗe seertuɗe seenike tawtoreede nduu muraadu, wondude e Dr. Hamet ɓatt immoriiɗo ɓaasinton, Dowlaaji Rennduɗi Amerika (U.S.A.), kanko woni joomiraawo lowre (site) lollunde inneteende www.jamtan.com e Sonna Hinndu Umar, debbo Caadinaajo e Dr. Iisa Jallo, immoriiɗo Burkina Faso. Sugu (sifa) ɓee ɗoo e yeru maɓɓe bus (ɗuuɗuɓe) seenike tawtoraama e nduu muraadu.
Dr. Iisa Jallo ƴetti yeewtere ko yowitii e fulfulde e fotnugol ɗemngal ngal waɗana ngal fonndoodi (standard), wano no o yeewtiri non kadi fii pinal e ɓamtaare ɗemɗe. O yeewti fii wootiɗingol alkule ɗen, gollitiren alkule goote, en fow, o jantii yeru alkulal gootal winndeteengal e mbaadiiji tati, ngal le ko ñ, ñ & . « Ngal ɗoo alkulal hin foti wootinɗineede ko ɓuri e yaawude », o maakani yimɓe ɓen. O yeewti ton kadi piiji (geɗe) hittuɗi ɗi heƴataa janteede ɗoo, ko yowitii e fotnugol ɗemngal fulfulde, e pinal men e no ɓamtorten. O holli kadi wonde yoga e winndooɓe fulfulde hino winndira alkule aarabuure, woɗɓe hino siñacani hoore mum’en alkule, woɗɓe hino winndira alkule laten, ko maa en fof winndiren mbinndudi wootiri si waawen ɓamtagol no yaawiri…
Sonna Hinndu Umar ƴetti yeewtere, o yeewti ko yowitii e darnde debbo nder ɓamtaare renndooji men. O yeewti fii debbo Afriknaajo e nder leyɗe Orop kam e nder leyɗe Afrika. Gila e jannde rewɓe haa e naatugol maɓɓe e nder nooneeji golle ɗin foppet, o wi’i si ɗum jaasii ɓamtaare heɓotaako e renndo woo renndo, wonaa renndooji fulɓe tun. O yeewtii kadi fii gollidal rewɓe e waylaare (change) fewndiinde e nder hanndeere ndee.
Dr. Hamet Wat ƴetti yeewtere ko yowitii e njananiri (diaspora) fulɓe e straatijii wiltino-jawdi haa e marugol ndi. O yeewti ko yowitii e wallitagol men enen ɗanniyankooɓe e ɓamtaare renndooji men he nder Afrika. Noy wallitorten ɓamtugol renndooji (jamaaji) men ɗin to iwɗen ton, tawa wonaa neldugol jawle ñaameteeɗe tun ? O yeewti fii waɗugol eɓɓooje (projects) ɗe hino wonana en ɓamtodal (codevelopment), e darnde nde njananiri fulɓe darotoo haa waawen ɓamtodaade e renndooji men, wonaa e nder Fuutaaji ɗin malla to fulɓe hoɗi heen tan, kono ko ɓamtodaade e leyɗe men enen ɓaleeɓe fuu.
Jonndeeji (workshops) ɗin to Galle Pinal: Ɓaawo golle rawnaama (gasnaama) to Palee de Bo Zar too, yimɓe ɓen yahi to Ibraahiima Timmbo (Sarlon) ñaamoyi soƴƴaari haa haari, on tuma non yimɓe ɓen yahri to jonndeeji ɗin fiɓetee too, to Galle Pinal Briksel (Centre Culturel), fahin ko nokkuure goo nii nde jeydaa e Palee de Boo Zar to batu ngun fiɓaa too. Ɓayri araama ton haa heewii, yimɓe ɓen sennditaa e mooɓorɗe (saalji) ɗen tati, gooto kala yahri ka yiɗi tawtoreede toon, nde wonnoo ko tiitooɗe tati seertuɗe, waɗeteeɗe e nder mooɓorɗe tati seertuɗe. 1-Jonnde (ataliyee) adanere nden woni : fotnugol ɗemngal fulfulde: 2-Jonnde ɗiɗmere nden : darnde rewɓe he nder ɓamtaare renndooji men : 3
– Jonnde tataɓere nden ko ko yowitii e wiltino-jawdi e marugol ndi:
Batu kawtital jonnddeji (ataliyeeji) ɗin, ñalnde 16 lewru juko (uksatu) : Nde araa ton, to Galle Pinal, woodii ko ardiiɓe jonndeeji ɓen holliti e nder mooɓorde wootere ko yowitii e jonndeeji fiɓanooɗi hanki mum ɗii tati, ko ɓuri hittude e mum, ko etagol joɗɗina kisan goomu toppitotoongu fotnugol fulfulde, fampagol haalirde (rajo) fulfulde winndere e ɗaɓɓugol feere no ceekol (channel) fulfulde heɓiree, sabu ɗee ɗoo geɗe tati non ko timmondirooje, kadi ɗe foppet ko e nder faandu wooturu ɗe yuppotoo, ndun woni faandu fotnugol ɗemngal fulfulde e ɗaɓɓugol laawol no faamondiren e hoore newaare, gila hiirnaange duungal Afrika ngal, ari hakkunde mum, haa yottoyoo fuɗnaange maggal, ɗum le waawaa yaawude laatagol, si en gollitiraali geɗe jantaaɗe ɗee, tawa caltuɗe (dialects) fulfulde ɗen foppet hino ukkee he haalirde, kam e ngol ceekol.
Fijo ngon gila to feccre ñallal : Dura Bari, mo ngenndi Gine, Dawuuda Jeey mo Senegaal, Mohamed Bah mo ngenndi Sarlon jooɗiiɗo Almaan e diɗɗal makko Mano River, Ceɗɗel Mbay (debbo mo Muritani) jooɗiiɗo Beljik, Maalik Paate Soh mo Senegaal e diɗɗal mum ɓelnere, e sukaaɓe rappeerɓe ɓe Gine e Sarlon jooɗiiɓe Faransi e ardagol sagataa gooto hino innee: Dianas (janaas), Faadal & Iisa Mbay jooɗiiɓe Beljik, e yimooɓe goo heewɓe. Yimɓe arii haa heewii, rewɓe e worɓe, sagtaaɓe e curabaaɓe, mawɓe e sukaaɓe, fulɓe e ɓe wonaa fulɓe, gooto kala ɗomɗaama yarugol seeɗa he ñeeñal fulɓe alɗungal, moni kala hino fadii nde fijo ngon fuɗɗetee.
Kuɗol: Saajo Bah (www.peeral.com)
