Yo Alla daɗndu Senegaal. Waɗi noon, ko gila Abdullaay Wad wiyi ina birga laamu tataɓol, Senegaalnaaɓe heewɓe ko saliiɓe, mbiyi ina potndi heen huunde fof, sibu e miijo maɓɓe, Doosɗe leydi Senegaal ndokkaani hay gooto waɗde manndaaji tati. Abdullaay Wad noon wiyi wonde oon sariya hiisaaki manndaa makko gadano oo, sibu о ƴettaa ko caggal nde o toɗɗaa gadanol, e hitaande 2001, nde njuuteendi manndaa artiranoo e duuɓi joy.
Diiso doosɗe Senegaal jaɓii, ñalnde 27 saawiyee ndee, 14 kanndidatiir e woote gardagol leydi ndii potɗe yuɓɓineede ñalnde 26 feebariyee 2012. Ina jeyaa heen Abdullaay Wad. Kanndidatiir Yuusu Nduur e Keebaa Kennde e Abdurahmaan Saar ndiiwtaama. Јаɓааɓе ɓee ko ɓee ɗoo : Makki Sal, Idriisa Sek, Tijjaan Gaajo, Mustafa Nas, Seek Bammba Jeey, Duudu Ndooy, Usmaan Tanoor Jeŋ, Njuuma Jakitee, Amsatu Soh Sidiɓee, Moor Jeŋ, Duudu Ndooy, Jibril Ngom, Ibraahiima Faal, e Umar Kasiimu Jah. So tawii won heen ko anndaaɓe, ina waɗi ɓe nganndaaka tawo no feewi.
Abdullaay Wad : jibinaa ko ñalnde 29 mee 1926 to Kebemeer. O toɗɗaanoo hooreejo leydi Senegaal ko ñalnde 1 abriil 2 000, o toɗɗitaa e hitaande 2 007. Ko o neɗɗo koosɗo, ƴoƴtanɗo politik, sibu o wonii kanndidaa laabi jeeɗiɗi : 1978, 1983, 1988, 1993, 2000, 2007 e 2012. Kо о amwokaa keewɗo seedanteeje jangde. Kanko sosnoo Pds e hitaande 1973. Omo jogii sukaaɓe ɗiɗo.
Amsatu Soh Sidibe jibinaa kañum ko e hitaande 1953. Oo debbo ko jannguɗo, sibu ko o doktoor detaa (Docteur ɗEtat), tee kanko woni debbo Senegalnaajo gidiiɗo wonde “ agrégée ”> e sariya. Ko o koolaaɗo kuuɓal dillere « Car Leneen ».
Seek Bammba Jeey, ganndiraaɗo Seek Abibullaay Jeey kam woni hannde meer wuro Ndar. Ko o depitee kadi. O jibinaa ko ñalnde 12 noowammbar 1965 to Ndar. Kanko fof e famɗude duuɓi, ko ngol woni ɗiɗmol ko omo birga hooreleydaagu : gadanol ngol ko e hitaande 2007, nde o heɓi 0,5%. To bannge ganndal, ko o aasiñoor. Kanko ardii fedde wiyeteende Fsd/Bj. Omo jogii sukaɓe nayo rewɓe.
Seek Tijjaan Gaajo : jibinaa ko ñalnde 16 settaambar 1956 to Ndar. O buñcinii e politik tigi rigi ko e 2009, caggal nde o yaltinaa laamu. Ko o doktoor ko fayti e kumpital. Kanko jooɗaninoo Banke adunanke (WorLD to Banque Mondiale to Washington) e Afrik hirnaange Farayseejo hade Wad nomde mo jaagorɗo geɗe caggal leydi e abriil 2 000. O wonii heen duuɓi 9, hade makko riiweede heen ñalnde 1 oktoobar 2009. Gila ndeen ko o dariiɗo, e nder fedde makko wiyeteende ‘Luy Jot jotna’ e haɓde e laamu Abdulaay Wad.
Juuma Jeŋ Jakite : Kannditiir ooɗoo debbo karallo kettuki bettii heewɓe, nde tawnoo o ɓurnoo anndireede e nder Senegaal e Afrik fof ko karallaagal makko to bannge kettuki comci. O meeɗaa ɓallaade politik fof. Hay so tawii noon hooreeɓe leyɗe Afrik heewɓe e rewɓe mum en ko kanko hettantunoo ɗum en. Fedde makko wiyetee ko “ Initiative Démocratique Jubel ” (Idj).
Jibriil Ngom : Kanndidatiir goɗɗo bettuɗo. Oo ɗoo karallo faggudu jibinaa ko 31 marse 1952 to Ndakaaru. О meeɗii wonde jaagorɗo Booñ kaalis e kitaale 90, caggal ɗum o ardinaa tufnde laaɗe (Port autonome) Ndakaaru, hade makko faatude to Mbaylaandi Simi Senegaal… Ngol woni gadanol makko birgude hooreleydaagu.
Duudu Ndooy kañum jibinaa ko Ndakaaru 4 ut 1944. O jeyaa ko e sosɓе Pds. Kono o yalti faade PS, o nomaa jaagorɗo. Ñaawoore e laamu Abdu Juuf, tuggi 8 abriil 1983 haa 2 saawiyee 1986. Caggal ɗum o sosi fedde Upr e hitaande 2 000, o woni kanndidaa e 2 007, ɗo o heɓi 0,29% (12ɓo nder 15).
Ibraahiima Faal ko kanndidaa ‘Taxaw temb. O jibinaa ko e hitaande 1942 to Tiwaawoon. Ko o karallo sariya. O wonii jaagorɗo e cili keewɗi e laamu Abdu Juuf, o wonii kadi mawɗo jannginooɓe duɗal jaaɓi-haaɗtirde Ndakaaru tuggi 1975 haa 1981. O wonii jaagorɗo Jangde toownde (1983-1984), jaagorɗo geɗe caggal leydi (1984-1990). Caggal ɗuum o wonii cukko kuuɓal kuftodinngal kalfinaangal Jojjangde aadee, o ardii kadi Nokku Jojjangde aadee wonande diiwaan Beeli mawɗi (Grands Lacs 1), o woni kadi cukko kuuɓal kuftodinngal geɗe politik e lewru sulyee 2002. Omo jogii sukaaɓе njoyo.
Idriisa Sek : O jibinaa ko 9 ut 1959 to Cees. Ko o tergal Pds o wonnoo hade makko haɓde e Wad e hitaande 2004, o riiwaa heen e abriil 2011, Kanko nii ardinoo kampaañ mum e hitaande 2 000. O birgi laamu e hitaande 2007, o ari ɗiɗmo (14, 86%). Kanko ardii dental ‘Idy president’.
Makki Sal ko kanndidaa mooɓondiral ‘Macky 2012’. O jibinaa ko 11 desambar 1961 to Fatig, ɗo o woni meer gila 2009. Ko o aasiñoor ko faati e ganndal lelngo leydi e ganndal keeriiɗe tagopeeje. O idorii ko And-jëf hade makko naatde Pds e 1989. O naati guwarnama ko 2001, o halfinaa heen fannuuji e cili keewɗi hade makko waɗeede gardiiɗo hilifaɓe e abriil 2 004. Caggal woote depiteeji 2007 o toɗɗaa cukko hooreejo Asaambele Ngenndi, kono o ɓooyaani heen, sibu o ittaa heen ko e settaambar 2008. Ñalnde desaambar 2008 o sosi parti makko (Alliance pour la République : Apr-Yaakaar). Omo jogii sukaaɓe tato, ɗiɗo rewɓe e gorko gooto.
Moor Jeŋ : jibinaa ko 6 settaambar 1958 to Mbakke. Ko o jaggal e parti Mustafa Nas, hono Afp, o wonnoo, kono o yalti heen e oktoobar 2 007, o sosi parti makko, hono Yakaar. Ko o karallo hiisa kaalis. Go’o makko birgude wonde mawɗo leydi.
Mustafa Nas : Ko o kanndidaa dental pelle biyeteengal ‘Bennoo Siggil Senegaal’. O jibinaa ko 4 noowammbar 1939 to Keur Majabel. Ko o neɗɗo ganndaaɗo nde tawnoo o ɓooyii e laamu, o wonii kaliifu e cili keewɗi, gila e yonta Senngoor. O ardiima kabine Senngoor, o wonii jaagorɗo Kodki e sato (1979) jaagorɗo geɗe caggal leydi (1979 e 1998), mawɗo hilifaaɓe (1983). O jooɗaniima Kuuɓal Fedde Ngenndiije Dentuɗe to Diiwaan Beeli mawɗi. O wonii kanndidaa Afp e hitaande 2 000 (o ari tataɓo 16, 8%). Nde Abdullaay Wad fooli, o nomaa mawɗo hilifaaɓe. E hitaande 2 007 o ari ko nayaɓo e woote gardagol leydi ndii (5, 93%).
Umar Kasisu Jah, jibinaaɗo e hitaande 1964, ardii parti ‘Niaxjarignu’. Ко o aasiñoor Informatik.
Usmaan Tanoor Jeŋ :Jibinaa ko 2 saawiyee 1947 to Ngeñiyeen. Kanko ardii PS. Ko o ganndaaɗo no feewi e nder politik Senegaal. O ardiima kampaañ Abdu Juuf e hitaande 2 000, hade makko birgude hooreleydaagu e 2 007, o ari tataɓo (13,56%).
Yoogaa ko e Seneweb
