Tuggi jamma alkamiisa оо haa subaka aset, ko almudɓe ina njaara, ina njima Nulaaɗo Alla (juulde Alla e kisal mum yo ngon e makko), ina nginna Allah. Ko ɗoon njiyataa, nanaa daaɗe e leƴƴii ceertuɗi, gila e safalfe muritaninaaɓe, wolofaaɓe senegaalnaaɓe, ginenaaɓe, malinaaɓe e ko wonaa ɓeen, ina njillondiri, ina njiirondora ina mbiya : alaa goodɗo so wonaa Alla. Ko ñalnde kikiiɗe aljumaa, Ziyaara oo fuɗɗii. Ko almuudo biyeteeɗo Saydu Nuuru TAAL, udditi Ziyaara oo e lomtaade Ceerno Aliw Tulla WAN, goownooɗo waɗde ɗuum, sabu rafi, heɓaani tawtoreede.
O udditiri ko Quraana, caggal ɗuum, o rewni heen konngol Ceerno Aliw Tulla huccitini e hoɓge ɓee, hoɓɓе Alla, ngaam bismaade ɗum en Caggal duurm, Aamadu Muusaa NGAYDE, yettini jamaanu oo konngol, tawi ko jubbannde e nguurndam Ceern AbdallaahiJAH. Konngrol ngol feññinii himpne Ceerno fayde e jangde. O janngii jangde binnde e seerenɓe heewɓe, haa o heɓi heen ko neɗɗo heɓata e jangde, dakmitoo. Kono o ronku heɓde heen dakamme mo o yiɗi oo. Ko maa Alla waɗi o jokkondiri e Ceerno Abdullaahi SAAKO, nde o dañi ko deeƴi e hakkille o dañi ko deeƴi e hakkille makko, hondo gannde mbirniindi (ganndal Alla e sirruuji mum). Ko ndeen kadi o faami tigi-rigi, holi nafoore. gannde peeñɗe (Quraana, sariya, ekn). O feññiini ɗoon wonde Ceerno Abdallaahi JAH, ko Ceerno nafoore mehre-mehre, alaa ko woni haaju mum, so wonaa nafoore ɓiyi Aadama. Ko ɗoon kadi, sukaaɓe heewɓe, ƴefti konnguɗi, ɓee kaali e Pulaar, ɓee e Arab, ɓee e Farayse walla Enngele, ina maanta, ina njaara ɓure Ceerno Abdallaahi JAH.
Nde jamma oo yahi haa feccini, Ceerno Abdallaahi JAH ƴefti konngol, yetti yimɓe ɓee, yeewtani ɗum en nafoore e ɓure Laawol Tijjaan, nafoore nehdi. O teeŋtinii almuudo wayi ko no neɗɗo lummbotooɗo e maayo ngo alaa powle nii. Ɗuum noon darnde alanaa mo, fooftere alanaa mo, so omo yiɗi heɓde dakkamme Laawol Tijjaani. Ceerno Abdallaahi JAH joofniri konngol mum ko noddude yimɓe feewde e Alla, e ñaaganaade ɗum en deeƴal ɓerɗe.
Caggal nde Ceerno Abdallaahi JAH joofni konngol mum, ko almuudo makko, ganndo, biyeteeɗo Aamadu BAH, lollirɗo Ustaaz BAH, ƴefti konngol. Hikka yeewtere makko fayti ko e firo deftere Sheex Baay NAS adii winndude, tawi ina yahra e duuɓi 21, wiyateende « Ruuhul Adab » hono : » nguurndam nehdi alliyankeewi « .
Ko deftere dowoore almuudo, haa anndina ɗum wonde, diine, wonaa yiilaade Aljanna, walla hulde Jayngol woni ko ɗaɓɓеe heen, kono ko joom Aljanna е Jayngol oo, woni jiileteeɗo, haa biyi Aadama annda hoore mum, annda Joom mum tigi-rigi.
Nde Ustaaz BAH joofni yeewtere mum, ko Ceerno Buubu BAH to Baabaaɓe, ɓami konngol, yeewtani yimɓe ɓee ko fayti e ɓure Laawol Tijjaani e ko fayti e sariya. Caggal ɗuum, tawi jamma oo jenngii, konngol arti e Ceerno Aamadu BAH, o udditi damal naamnde, hono no Ceerno makko waɗatnoo nii. Dow yamiroore ceerno makko, Ceerno Abdallaahi JAH, o jaabiima kala naamndal naamndangal, gila e naamnde paytuɗe e diine, e nguurndam renndo, haa e paytuɗe e dawrugol. Ko subaka aset oo, Ziyaara oo gasi, caggal nde Quraana jannngaa, seerenɓe ɓee nduwaani arnooɓe ɓee, gooto fof loowti laawol, hooti to umminoo.
Aadama GISE
Fulo : Aamadu Muusaa NGAYDE
