Abdul Ajiiju Sal, gootal e jagge cosnooɗe dowla Muritani, sankiima ñalnde alkamiisa 11 ut hedde waktu 4ɓо (weetndoogo). Abdul Ajiiju Sal jibinaa ko ñalnde talaata 1 saawiyee 1924 to Mbuun, kono o jeyaa ko Haayre Mbaara. Oon sahaa tawi baaba makko, hono Jakariyaaw Sammba Jaara SAL (Jakariyaaw Sala Daado SAL), ko cafroowo (Aafirmiyee) gollodtonooɗo e koloñaal (1919-1931). Baaba oo heɓi alteret mum ko e hitaande 1947, fayti Haayre Mbaara, ɗo sankii ñalnde aljumaa 21 desammbar 1951. Abdul Ajiiju fuɗɗorii ko toppitaade hiisaade ngalu sosiyatee biyetenooɗo Lacombe (saawiyee 1942 haa saawiyee 1945). O golliima e guwarnama Territoire d’Outre-mer français, ɗo Ndar ɗoo, o golliima e mooftirde ngalu kuftodinnde (trésorerie générale) A.O.F. ɗo Ndakaaru ɗoo (mars 1948 haa nowammbar 1956) caggal ɗum to Diiso mawngo ko wonnoo. A.O.F. kam e to Asammbele denndaaɗo (fédéral) mo Mali (renndunoo ɗum ko Senegaal e Sudaan). E nder ɗuum, o dariima darnde teeŋtunde ngam liggaade Muritaninaaɓe fiilaaɓe wonnooɓe to Senegaal mbele ina caloo haɓanaade federaasiyoŋ (tuggude sulyee 1958 haa mee 1960). Abdul Ajiiju Sal wattindii wonde hooreejo asammbele e laamu Muttaar wul Daddaa (tuggi aljuma 14 noowammbar 1975 haa alet 09 sulyee 1978, jofnde kuudetaa 10 sulyee 1978).
Abdul Ajiiju woniino kadi hooreejo kabinee Muttaar wul Daddaa, o wonii kalifu geɗe nder leydi, o woniino kadi kuuɓal duumingal PPM. Muttaar wul Daddaa seedtinooma e deftere winndunoo wonde “ ko Abdul Ajiiju Sal e Ahmed wul Muhammad Salah ɓur-mi ɓooydude e laamu : tuggude 1961 haa 1978… Ко o ngenndiyanke mawɗo, jarlitaniiɗo renndo, mo waɗirtaa haa manee, mo alaa miijooji leñamleñamaagu ”.
Fedde Ɓamtaare Pulaar e Muritani ina duwanoo ɓesngu Muritani kala, kam e Komiseer Sal Jibriilu, e Ibraahiima Abuu Sal (Abuu Keccal) to Farayse, e Muusaa Sal ɗoo e Nuwaasoot, (miniraaɓe makko) sabu ngal ɗoo baasal. Fedde ndee ina ñaagoo Alla nde moƴƴata e makko. Aamiin
