Bhumibol Adulyadej, laamɗo Taylannde. E nder leydi makko o jaggiraa ko no allayel nii. Kanko woni hooreejo leydi ɓurɗo alɗude. Ngalu makko ina tolnoo e 24 miliyaar Oroo (9 240 miliyaar uguiyya), hay so tawii noon luulndiiɓe mo to bannge politik e leydi ngoongɗinaani ɗum fof ko ngalu makko.
Hooreejo leydi ɗiɗmo to bannge alɗude ko Sultaan Dowla gooto ina to Asii fuɗnaange worgo ina wiyee Buruney. Buruney ko leydi keewndi petroŋ e gaas. Otooji hooreejo leydi o ko ujunnaaje ujunnaaje, ɗum jiidaa e otelaaji, ko nanndi e Plaza Athénée walla Maurice Buru to Pari. Ngalu makko fotde 16 miliyaar oroo (6 160 miliyaar ugiyya).
Hooreejo leydi tataɓo to bannge heewde jawdi ko persidaa Amiraaji Arab dentuɗi (kanko kadi woni Emiir Abuu Dabi, gooto e Emiraaji ɓurɗi alɗude). O wiyetee ko Khalifa ben Zayed Al Nahyane. Ngalu makko ina tolnooо е 14, 3 miliyaar oroo (5 505 miliyaar ugiyya). Rewi e makko ko AbdAllah ben Abdelaziz Al Saoud, laamɗo Sawuud. Ngalu makko fotde 13,7 miliyaar Oroo (5 274 miliyaar ugiyya). Sukki heen ko Silvio Berlusconi hooreejo leydi Itaali. Caggal oon ko Hans-Adam II, laamɗo leydi ina wiyee Liechtenstein (leydi tokosiri to Orop fuɗnaange) ; rewi heen ko Hamad ibn Khalifa Al Tani, Emiir Kattaar. Refti heen ko Asif Ali Zardari, persidaa Pakistaan e Albert II laamɗo Monaco, caggal makko ko laamɗo leydi Sili…
