Ɓurɗo anndireede “ Decroix ” seegiima heerto dawrugo AJ/PADS. O joɗɗinii kawtal ñalɗi 12 e 13 e 14 lewru Suwee 2009, to Ndakaaru. Eɗen ciftora ko kanko wonnoo cukko koolaaɗo kuuɓal AJ/PADS, o rewi e Landingg Sawaane, koolaaɗo kuuɓal heerto ngo. Eɗen cifotora kadi ko kanko wonnoo jaagorɗo Njeeygu nder laamu Sheek Aajibu Sumaare. Caggal nde maalde Sopi 2009 e gardagol PDS juggi nder fiilngo meeriiji, Abdullaay Wad yaltini kala ɓe njeyanooka e PDS, haa arti noon e keerti bayɗi no AJ/PADS. E nder hitaande 2007, saanga fiilgno hooreejo leydi ɓennungo ngo, Landing Sawaane daɓɓiino fiileede, o dikkondiri e Abdullaay Wad. Ko o Jaagorɗo Dowla noon o wonnoo. Halfinanoo jeeyngal makko ko Mammadu Joob Decroix. Nder konngi jeeyngal makko ina wonnoo heen « ngondu-mi ko e wuyɓe kono mi wonaa gujjo« , omo malla yimɓe PDS. Ɗum noon welaani Abdullaay Wad e yimɓe mum. Ɗum welaani kadi wayɓe no Mammadu Joob Decroix. E wiyde fanniyanke dawrugol biyeteeɗo Babakar Justin Njaay, ngal kawtal seegaare ngal Decroix yuɓɓini, ko lefol gadanol kasanke AJ/PADS. Lefol ɗiɗmol ngol ko nde senngo Landing Sawaane yuɓɓinta kam ne kawtal mum nder lewru Deesambar arooru ndu. E wiyde makko haa jooni “…ɗii leppi ɗiɗi, ɗi Abdullaay Wad ñootiri gaaraaji jiyniiɗi, timminta kasanke mooftoowo jiiba AJ/PADS”.
E yonta mo keerti dawrugol Senegaal ngoni e ruttaade e besngu, ina kaɓɓondira haa kuccita e PDS ko wayi no Benno Siggil Senegal, Génération du Concret… ko е оo yonta AJ/PADS) yerƴаta hoore mum nder woyndu yoolooru. Justin Njaay teeŋtini konngol mum nde wiyata wonde hay so Landing Sawaane wonaa gujjo ne “о woɗɗaani ɗoon ngati o suurii wuyɓe ko juuti, kanko joɓetenooɗo lewru fof miliyonaaji 3 CFA”. Mooftoowo gujjo ko gujjo.
Ko ɗum tagi Abdullaay Wad mettinde. O waɗti jokkondiral makko e AJ/PADS e juuɗe Decroix, o natti rewrude e Landing Sawaane. Ceede o rokkatnoo keerti ɗi PDS waɗdi maalde ndewrata hankadi ko e Decroix. Landing ne mettini e ɗuum. Ko ɗoo Wad ummanii yoolde AJ/PADS, o renndini musidɓe, rennduɓe fof ko ina tolnoo hannde e duuɓi capanɗe tati.
Maalde dawrugol fawotoo ko e piɓle laaɓtude.
Eɗen cifotora, e lewru Marsa 2000, ko maalde libi Abdu Juuf e PS. Maalde faanaaldu almuudo renndinnde calliido kuɓɓudo Abdullaay Wad, kominist ɓooyɗo Hammaat Dansoko, Mustafa Ñas сееgiiɗo PS, Abdullaay Jeey Islaamiyanke newiiɗo… ɓee tawondiri e daraninooɓe wakilitere, Abdullaay Baccili e Landing Sawaane. Ɓe fof njaltii maalde Sopi (PDS…) gila ko ɓooyi, haa heddii AJ/PADS mo Landing Sawaane. So hare juuti, baawɗi e doŋkuɗi ceertat. So maalde fawaaki e piɓle, wattinta ko seekaade. So dañal e yiɗde ngardiima, reftata heen ko reftaade gaño mum, ruŋtaade nafoore ɓesngu.
Yoonu Askan wii ronii AJ/PADS
Rawane, huunde e terɗe AJ/PADS, njiyiino ko ari hannde ko. E gardagol Majeey Mbooc, terɗe timmude AJ/PADS kolliri mettere mum en e no Decroix daroorii hannde nder laamu Abdullaay Wad. Ɓe njiɗi Landing waɗta heerto maɓɓe ngo e laawol peewal, ɓe njalta laamu ngu, kono Decroix e wondiiɓe mum calii. Ɗum addani ngoo senngo yaltude AJ, ɓe cosi dillere nde ɓe inniri Yoonu Askan Wii (Laawol Ɓesngu). Ɓe hannde njeyii goonga… Landing anndii ndeke Decroix wonnoo tan ko e fuuntude ɗum.
Landing Sawaane e Basiiru Saar e Decroix e Muhamadu Daf, ngartiree hakkillaaji. Hanki, AND JËF ko diillere renndinnoonde kala ko ina nafa e Senegaal. Kayre ardinoo kareeli koloñaal-keso, haa harbiyankooɓe mawɓe ɓelsi heen piɗtaali mum en… Siftorooɓe D. Daf, Umar Blondin Joob, ekn… siftorooɓe wuurɓe hannde hono Eugenie Rokoya Aaw, Awa Jah, Sheek Tijjaani Gaajo maa nganndu AJ jibinii nafooɓe ɓesngu. Yoga e hoohooɓe waklitere ɓiɓɓe Senegaal, njaltii AJ/PADS… Landing Sawaane e Basiiru Saar e Decroix e Muhamadu Daf, ngartiree hakkillaaji. Sikke alaa on njuumii. Ɓuri toowɗe e yimɓe ko ganndoowo juumii, arta e yankinaare.
Sagataaɓe hannde wonaa nder AJ/PADS tawetee. Kono hannde kareeli ko hakkunde ɓiɗɓe-yumma. Mo woni fof ina daɓɓa nde Sheek Tijjaani Sih (Jaagorɗo geɗe Ndernderi) wonanta ɗum. Wonaa nde MRDN haa AJ kuccitta e Jean Colin mbiya ɗum « gite, hoto ñaam am« . Ɗum wontii daartol. Won haaliyanke gooto wiyi « … ko waliyaaɓe miijo toono waklitere ardata, harbiyankooɓe tabitina ɓelsa heen piɗtaali mum en, haydara en ngara nafotoroo« . Hannde, waliyaaɓe waklitere Senegaal, majjii, harbiyankooɓe maayii, dara en inan mbimiloo. Ko goonga won sagataaɓe suuɗiiɓe, kono ɓeen hannde wonaa nder AJ/PADS tawetee.
Aamadu Malal Gey
Fooyre Ɓamtaare – Ndakaaru
