Masauud wul Bulkayr, hooreejo Asammbele Ngenndi woni ko e njillu caggal leydi ko ina ɓura jooni balɗe 20. Ñalnde aljumaa 12 desammbar 2008 o yeewtidii e Blaise Kompaoree hooreejo leydi Burkinaa ko ina wona waktuuji ɗiɗi, to Wagadugu. Omo wondunoo e terɗe Maalde daraniinde kisal demokaraasi hono FNDD, Siidi Muhammed wul Amejaar e Sidnee Sokona e Abdel Kudduus wul Abeydnaa. Alaa ko siyi tawo e haala maɓɓe. Ina anndaa tan, Belees Kompaaore ina heewi faayiida hannde e nder Afrik, tee Burkinaa jeyaa ko e terɗe Goomu Kisal Fedde Ngenndiije Dentuɗe. Ñalnde 13 desammbar, hooreejo asammbele Burkinaa, hono Roch Christian Kabore, arii juuraade mo to jippunde makko to Hotel Libya. Kanko e lappol FNDD, ɓe ngidorii ko Adis Abeba, ɓe ndewi Daar Salaam, ɓe payti Peretoriyaa.
O heɓii yiyndirde e Jean Ping, hooreejo Goomu Dental Afrik, kam e hooreeɓe leyɗe Tansaani (Jakaya Mrisho Kikwete) e mo Afrik worgo, hono Kgalema Motlanthe. O hawriti ɗo Afrik Worgo ɗo e kalifu kumpital laamu koninkooɓe, hono Abdarahmaan wul Moyne, gonnooɗo diiseteeɗo ammbasaad Muritani to Peretoriyaa. Wul Moyne yiɗnoo ko yiyndirde e kalifu jokkondiral Afrik Worgo, kono ɓeen njaɓaani, sibu mbiyi ko keptinaani laamu militeer en. Ɓe ɗaɓɓiri mo nii yo o yaltu leydi maɓɓe ko yaacii. So ɓe ngummiima Burkinaa, ɓe tiindotoo ko Niiseriyaa. Toon ne kadi, wul Moyne yiɗiino jaɓɓeede toon, kono dañaani.
Bookara Aamadu BAH
