Nana wona dumunna jooni ko Ameriknaaɓe keblantoо woote gardagol leydi mum en e hitaande 2008. Woote toon ina ceerti no nganndir-ɗen gaa nii. Ko idii fof, yiɗɓe wonde kanndidaaji ɓee maa mbaɗa kawgel e nder partiiji mum en, mbaɗa kampaañ timmuɗo. Jaayɗe aduna ɗee ceeraani haalande en ɗo kawgel yahrata е nder partiiji ɗiɗi ɓurɗi mawude ɗii : demokaraat en e rippobilikee en.
Wonande gadano oo, inde ɗiɗi inan maantini toon : Hilary Clinton e Barak Obomo, mo nganndu-ɗaa iwdi mum ko Kenyaa. Heewɓe cikkata ko ɗii ɗoo partiiji ɗiɗi tan ngoodi toon, alaa, ina woodi goɗɗi, kono ɗii ndoolnaani tan. Ko famɗi fof jeegom goɗɗi ina ngoodi toon tee ina njogori toɗɗaade kanndidaaji mum en.
Hakkillaaji keewɗi noon kucciti ko eBarak Oboma, sabu iwdi makko. О jibinaa ko ñalnde 4 ut 1961 to Honolulu (Hawai). Baaba makko ko juulɗo, wiyetee ko Barak Huseyn Oboma, tee jeyaa ko Kenyaa. O hawrii e caɗeele keewɗe e cukaagu makko, nde tawnoo jiknaaɗe makko ceertii tawi omo famɗi. O janngi ko ko fayti e ganndal sariya. Ko e hitaande 1996 o toɗɗaa senaateer dowla biyeteeɗo Illinois.
