Boyi ina yahatnoo ina waɗɗii e ngelooba mum, haa heɓtii gunndo ina yaha e leydi ngulndi ina waɗa lekki e lekki. Boyi yurmii gunndo, jusi ngelooba, kifli mbo, ɓe njawti tan gunndo ina yeewta. Gunndo ina ɓosa tan, ina abboo yeeso haa heɓi boyi. Boyi jiiɓii, ina firloo ɗaldi mbo ngelooba baa tawi hankadi ɓe ngoowondirii no feewi.
Ndeke ko ɗuum gunndo fadatnoo, fiyi ngelooba sawru, boyi rewi e maɓɓe ina doga ina nodda. Ko noon ɓe ngoori ha ɓe naati he wuro wooto, ɓe keɓtondiri ɓe koccondiri cabbi, yimɓe nootii heen. Ɓe degginaa kamɓe e ngelooba haa galle joom wuro.
Ɓe njangtii, joom wuro oo ko ñaawoowo keɓtinaaɗo ina yettee Jallo, wiyi ɓe : “njahee lelo-ɗee haa subaka, kala e mon gadiiɗo, addi salaatu juuli, salmini, ko oon jeyi ngelooba baa !”
Nih ɓe njahi, gunndo humi arkille, waali ɗaanaade, boyi waali riddeede dawaaɗi haa fajiri seekii, darii wiyi “Allaahu Akubaar” tan, gunndo ina lelinoo haftii jooɗii wiyi “Asalaamu Aleykum wa Rahmatu Allah”.
Joom wuro yalti wiyi “laaɓii ko alaa guli, ko gunndo jeyii ngelooba ba”.
Nih boyi suutii feewi ladde wiyi : “Harminii hoɗde e wuro saka waɗde moƴƴere”.
