To Angalteer debbo gooto dañii funeeɓe ɓe toɓɓugol mum en heccondiri jonte tati. Ɗum firti ko o ɓamii reedu tawi omo woni reedu ! Ko ngol waɗtata ɗimmol ko Fooyre Ɓamtaare ine yaltina huunde waande nii haawnaade, wiyeteende “superfétation”.
Kanko debbo oo, ko o donkunooɗo ɓamde reedu, omo safroo. Ko ɗuum tagi, nde o tini o ɓamii reedu, weltaare makko alaa ɗo haaɗi. E oon sahaa noon, doktoor oo ine yenanaa ko ɓiɗɗo gooto o saawi. Jonte sappo e ɗiɗi (12) caggal ɗuum (lebbi tati), nde o waɗi ekogaraafi laawol tataɓol, doktoor oo mugaa no feewi : nate ɗee kolliti ko sukaaɓe ɗiɗo, heen gooto ine ɓuri goɗɗo oo mawnude no feewi.
Ko wayi nii ko nii ardata : Caggal nde debbo ɓami reedu, ɓoccirɗe makko ngoppita ɓoccoonde woɗnde (ko heewaani waɗde koo). E oon sahaa so o jotondiraama, ɓoccoonde ndee ina waawi toɓɓeede. Wonande ooɗoo debbo noon, doktoreeɓe ɓee ine cikki saabii ɗum ko omo ƴettatnoo lekki ngam semmbinnde geñgol makko ko adii nde o ɓamata reedu. Ko huunde nde heewaani noon, sibu e winndere hee kala, ko wayi nii timmaani laabi sappo.
Bookara Aamadu Bah
