Muritani ɗaɓɓii laaɓal
Ñalnde 17 siilo (saawiyee) muritaninaaɓe njeeɗiɗo mbaraama nder Mali, hakkunde Tarabakoro e Akure, fotde 80 kiloomeeteer hakkunde mum e keerol hakkunde leyɗe ɗiɗi ɗee. Waraaɓe ɓee ngumminoo ko Addel Bagru nder diiwal Hod Fuɗnaange Muritani, eɓe tiindii sahre Naara. Ko ɓe aadoriiɓe yahde luumo nder Mali. Warngo ngoo leelii saakteede, ngati ko maa balɗe pawii heen nde Hooreejo leydi Muritani holliti mettere mum fakitnde e warngo waɗngo ngoo. O neldi toon jaagorɗe tati, hono jaagorgal geɗe caggal leydi (Ismaayiil Wul Seek Ahmed), e Jaagorgal Ndeenka (Hanan Wul Siidi), e Jaagorgal nder leydi (Mohamed Saalem Wul Mersuuk) e gardiiɗo kuuɓtidinɗo Ndeenka ngenndi (Mesqaaru Wul Siidi). Kamɓe kala ɓe njahi to Mali ngam laɓɓitinde warngooji ɗii. Warngooji mbaɗi kadi ko caggal njillu sete jaagorɗe leydi Mali, e gardagol jaagorgal toppitiingal geɗe caggal leydi, Abdullaay Joop, he Muritani, ngam ko faati e kuuge ɗe Cedeao fawi he Mali ɗee, ɓe njooɗodii e hooreejo leydi Muritani, hono Mohamed Wul Ghazwaani.
Caggal ɗuum, laamu sabbordu leydi Mali yaltinii bayyinaango heɓtinde goodgol ngoon warngo e yaafnaade laamu Muritani. Ngu huniima udditde losko laaɓtungo, waawngo teeŋtinde warngo waɗngo ngoo. Bayyinaango ngo laamu Mali saakti ngoo waɗi ko ɓaawo nde jeewtidal hakkunde sete jaagorɗe Muritani e hooreejo laamu sabbordu Mali, Asimi Goytaa. O hollitii o ƴettii pellital ɓeydude ndeenka hakkunde maɓɓe e jaagorgal semmbeeji ndeenka Muritani.
Ko wayi nih wonaa ngol laawol tan meeɗii waɗde, joo e joo kala, konuŋkooɓe Mali ine tuumee e warngooji baaɗi nih, ngati keerol hakkunde Muritani e Mali ko karwal joorngal kos, muritaninaajo ine rewa yahde haa naata e Mali tawo tinaani. E nder 2012, konu Mali teeɓinooma kadi 16 muritaninaajo, huunde dillinnoonde ɓesngu leydi ndii. Gila nde ɗiin warngooji mbaɗi, ko ɓesngu wuro Addel Bagru adii seppude teeŋti e yeeyooɓe jehre ɓee mbaɗi mbeefeegu mumen ñiŋi hoohooɓe laamu nguu wonɓe e diiwal Hod bannge fuɗnaange. Ɗiin seppooji ndeɓi haa yettii Nuwaasot, ngam hollirde mettere maɓɓe. Ɓeen seppooɓe ñiŋii no feewi hoohooɓe jooɗaniiɓe laamu nguu nder diiwe leydi ndii, e wiyde maɓɓe ɓe kaajaaka ndeenka ɓiɓɓe leydi ndii, so laamu nguu wondaaka ndeenka maɓɓe, kamɓe ko ɓe toppittooɓe kisal maɓɓe ɓe ngoppirtaa nih sahaa kala sukaaɓe maɓɓe ine mbardee nih.
Jaayre Pinal
