Hooreejo HAPA, El Huseyn wul Meddu, ñalnde 1 suwee 2021, he udditgol heblo ngoo : « HAPA ine toppitii kadi kisnugol pine kam e piɓle ngootaagu ngenndi ».
« Jaayɗe he ɗemɗe ngenndiije », ko ɗum woni tiitoonde heblo nde Ardorde Toownde Jaayɗe e Nanyiyngo (HAPA) juutii ñalnde 1 suwee 2021. Lulnde ndee foti wonde ko balɗe tati, tuggi 1 haa 3 suwee 2021 to joɗnde HAPA, wonande jaaynooɓe nder ɗemɗe ngenndiije ummoriiɓe e jaaynirɗe laamu (Rajo Muritani e Tele Muuritaniyaa) e jaaynirɗe keeriiɗe. Pelle pinal Pulaar (FƁPM), e Sooninke (AMPLCS) e Wolof (APROLAWO) mbismaama, tee nootiima kewu nguu, ko jiidaa e yimɓe tato jeyaaɓe e pelle ɗee fotɓe hebleede. Fooyre Ɓamtaare neldii toon kañum ne yimɓe ɗiɗo hebleteeɓe. Heblooɓe ɓee kadi cuɓaa ko e haalooɓe ɗemɗe ɗee : Kaliilu Jagana wonande wonande Sooninke, Mammadu Njaay ganndiraaɗo Boskoo wonande Pulaar e Mammadu Gey wonande ɗemngal Wolof. Hooreejo caaktugol Fooyre Ɓamtaare bismaama e ñalawma gadano oo, caggal udditgol heblo ngoo, ngam siimtande tawaaɓe ɓee humpito Fooyre Ɓamtaare.
Hooreejo HAPA, e nder konngol mum udditirgol heblo ngoo, wiyi : « miɗo sikki ko ngol woni gadanol ko eɗen teeŋtina haa laaɓti ceertugol edda e keewal nder dokkugol kabaruuji he nder leydi men… Won ɗo kollit-ɗon wonde jaaynooɓe he nder ɗemɗe ngenndiije, tuugotoo ko e kabaruuji binndaaɗi he ɗemɗe goɗɗe. Ɓe keewi ko firde, heen sahaaji no firdetee nii ine wayla maanaa kabaaru dokkaaɗo oo ». O ɓeydi heen wonde « HAPA, gaa gaa golle halfinaa ngam yuɓɓinde, ine jogii faandaare woɗnde, ndeen faandaare woni ƴellitde keewal ɗemɗe nder dokkugol kabaruuji, sibu ine wiyaa e doosɗe mum wonde « HAPA ine toppitii kadi kisnugol pine kam e piɓle ngootaagu ngenndi ». O jokki « kuulal 8 sariya 045 jowitiingal e kumpital nanyiyngo ine teeŋtini dokkugol kabaruuji ceertuɗi, celluɗi, hono ɗooftaade keewal pine e ɗemɗe nder renndo men ». Heblooji goɗɗi maa njuɓɓine e nder tiitooɗe goɗɗe baaɗe no « Fakes News, Fact checking, heblooji karallaagal. Kabaaru ko hakke wonande yimɓe fof, o foti waɗde ko naftude leƴƴi leydi men kala. »
Ciimtol Bookara Aamadu Bah
