Enen kam eɗen nganndunoo heedeede e naange welaani, sibu eɗen njoganii ɗum konngol « a heedii kam e naange », kono yettaaki ko njiɗ-ɗen jangtaade koo, sibu, kala kaalanaaɗo ɗum, wiyata ko « waawaa wonde ».Kono ko huunde woodnde, kewnde to Farayse to nokku Essey-lès-Nancy. No galleeji ɗiɗi takkondirɗi keewi waɗdude nii, heen galle gooto ina wirni sardiŋŋe galle goɗɗo oo e naange.
Ñaawoore wiyi jom galle birnuɗo oo, yo hel huɓeere mum ɗoo e feebariyee 2016. Kanko jom galle oo, o wiyetee ko Sarah Rebai (duuɓi 53), o gollotonoo ko e cafrirɗe haa o heɓi alteret (ballo cafroowo), tee jom galle makko sankiima duuɓi jooni. E 2010 o felliti yaajtinde galle makko ɗo o wuurdi e sukaaɓe makko ɗiɗo, duuɓi 20 jooni. O waɗi ko fotnoo waɗeede fof, haa o rokkaa yamiroore mahde, o yahi banke, o ñamlii fotde 176 000 oroo (hedde 70 miliyoŋ ugiyya) potɗi yoɓeede nde duuɓi 25. Ñalnde 26 abriil 2014, caggal nde koɗdiiɗo oo wullitii, tirbinaal Nancy ɗaɓɓiri Sarah yo hel huɓeere mum, yoɓa kadi 4 000 oroo sabu lor lori koɗdiiɗo mum oo, e « kaljingol hoɗdiiɓe ». Yimɓe ɓee fof kaawaa ɗum, sibu ko go’o maɓɓe yiyde neɗɗo ina yahdaa laawol sabu birnugol e naange.
Caggal ɗum o wullitii to ñaawtirde. Kono, ñalnde 14 ut 2015, kono konngol ñaawoore ko gootol « yo o hel huɓeere ndee ɗoo e feebariyee 2016 ». Alaa ko heddii so wonaa sehilaaɓe makko ina mballa mo e jeeyngal, ɓe mbinndi ɓataake feewde e Ñaawirde Nancy.
Hakke koɗdigal ko huunde mawnde e aduna hee fof. Kono ina famɗi ɗooftiiɗo mo e nder renndo men, haa teeŋti noon e nder teeruuji ɗii. “Hoto kelee galle Sarah Rébai !” Oo debbo heɓii yamiroore mahde galle mum; huunde nde hoyɗatnoo waɗde e aduna makko ngam wuurde e deeƴre, sinu jom galle makko wuuraani, tee omo jogii sukaaɓe ɗiɗo. Koɗdiiɗo makko nawi mo laawol sabu o heedii ɗum e naange caggal nde o mahi huɓeere makko. Kono oon fof e nattude hoɗde ɗoon ko ɓooyi, tirbinaal ina heddii e yamirde kelgol huɓeere ndee.
BAB
